Foro aconceyó con Iniciativa pol Asturianu con motivu del 25-M

Emilio Marcos Vallaure y Alfredo Ignacio Álvarez Menéndez, responsables de Política Llingüística de Foro, aconceyaron con Iniciativa pol Asturianu con motivu del 25-M. El coleutivu demandó l’usu del idioma nes intervenciones públiques.
 
Según informó Iniciativa pol Asturianu, Foro de Ciudadanos foi la única formación que respondió’l hasta momentu’l pidimientu de reunión que llanzó a toles formaciones que se presenten a les eleiciones de 25 de marzu. Nel aconceyamientu, que tuvo llugar el martes, acudieron les dos persones responsables de Política Llingüística del partíu llideráu por Francisco Álvarez-Cascos, Marcos Vallaure y Álvarez Menéndez, a los que’l coleutivu recordó la necesidá “de que les fuercies polítiques usen l’asturianu nos sos anuncios eleutorales en valles, televisión, radio y redes sociales, amás de nes intervenciones públiques de los sos llíderes, como meyor forma d'amosar el so compromisu col idioma”.
 
Amás, pidió a Foro qu’incluya nel so programa iniciatives más ambicioses pa normalizar l’asturianu, recordando qu’hai munches formes de facer por ello ensin gastu pa l’Alministración. Tamién recordaron que l’estatus d’oficialidá, “si bien nun ye una solución definitiva pal idioma d’Asturies, ye imprescindible p’asegurar el futuru del asturianu”. Por último, Iniciativa pol Asturianu, que ta preparando un informe nel que estudia los conteníos en política llingüística de toles formaciones que se presenten a les eleiciones, ufrió a Foro asesoramientu y collaboración en cuestiones llingüístiques.
 
Rellaciones Internaciones
 
Iniciativa pol Asturianu ta acabante d’inaugurar un perfil en Facebook col que pretende dar a conocer internacionalmente la problemática de la llingua asturiana. Baxo’l nome de ‘Iniatiative for Asturian – International’, el coleutivu espera con esta iniciativa reforzar les sos rellaciones internacionales. Nunos díes, esti perfil va tar tamién presente en Twitter.