Álvarez-Cascos nun almite que naide discuta’l derechu d’Asturies a recibir los fondos mineros

L’hasta agora presidente del país, Francisco Álvarez-Cascos, nun almite que naide discuta’l derechu d’Asturies a recibir los fondos mineros que-y correspuenden. Por ello, pidió a los asturianos que piensen nel “so país” a la hora de votar.
 
El candidatu de Foro de Ciudadanos, que fixo estes declaraciones nun actu políticu en Cangas del Narcea, insistió en que "el Gobiernu d’España tien nestos momentos col Principáu d’Asturies compromisos de pagu pendientes del primer y segundu Plan de la Minería, en situaciones alministrativaes diferentes, por un importe total cercanu a los 800 millones d’euros”. Amás, señaló que l’Executivu estatal adeuda a Cangas 9 millones d’euros de dichos fondos, "retrasaos pol revanchismu d’Areces col gobiernu municipal anterior" y que "agora’l Gobiernu del PP propónse eliminar".
 
Por ello, pidió a los asturianos que piensen nel “so país" a la hora de votar el 25 de marzu "pa evitar que se repita’l fracasu d’estos años y qu’Asturies continúe escaecía, marxinada y discriminada, antes pol PSOE y agora pol PP y pol Gobiernu de Rajoy". "¿Pueden los asturianos pensar que’l so votu va ser útil si lo depositen a favor de quienes nun se comprometen nin colos fondos mineros pendientes, nin coles infraestructures d’Asturies paralizaes, nin coles ayudes al sector naval, nin cola reducción de costes enerxéticos de la nuesa industria metalúrxica, nin con una defensa firme del nuesu sector ganaderu de lleche o de carne ante la reforma de la PAC, y asina sucesivamente?", cuestionó Álvarez-Cascos.
 
Otra manera, y tres criticar la paralización de les obras del Parador de Courias, el candidatu anunció que Foro comprométese a "revisar el Plan d’Ordenación de los Recursos Naturales (PORNA) pa garantizar la calidá de vida de tolos asturianos que viven nes zonas rurales del Principáu".