Los candidatos a rector comprométense al usu del asturianu nel logu de la Universidá d’Uviéu

Vicente Gotor y Paz Andrés, candidatos al rectoráu de la Universidá d’Uviéu, comprometiéronse col Conceyu Universitariu pol Asturianu (CUPA) al usu del idioma nel logu de la institución. Asina, ésti va ser billingüe.
 
Según anunció’l coleutivu, tres un aconceyamientu con caún de los dos candidatos, éstos firmaron un documentu qu’establez un programa d’actuaciones en política llingüística pa desendolcar nos años vinientes. Ente los puntos firmaos destaca’l compromisu “de diseñar y oficializar” nun plazu d’un añu y mediu “un logotipu billingüe (asturianu/castellán) de la Universidá d’Uviéu / Universidad de Oviedo, nel que dambos nomes apaezan siempres y ensin diferencies gráfiques ente les dos llingües”. Amás, nun plazu de seis meses, Gotor y Andrés van impulsar y aprobar un reglamentu de rotulación pa que tolos cartelos que sían anovaos tean nos dos idiomes, y “van reclamar con firmeza” énte’l Gobiernu asturianu y l’estatal “el reconocimientu de les categoríes profesionales de los maestros y profesores d’asturianu, que colos títulos oficiales salen formaos de la Universidá d’Uviéu”.
 
D’igual forma, nun plazu d’un añu, van reforciase les competencies de la Comisión de Normalización Llingüística, encargandó-y la redaición d’un Plan de Normalización Llingüística pal periodu del mandatu rectoral coles midíes que se consideren necesaries pa completar el procesu de normalización na institución. Por último, los candidatos comprométense a siguir impulsando la presencia del asturianu nes cuestiones yá llevaes alantre nel mandatu anterior. “El CUPA celebra’l consensu xeneráu alredor de les polítiques llingüístiques na Universidá d’Uviéu depués de los pasos daos alantres nestos años, anque recuerda qu’entá queden munches coses por facer pa garantizar la igualdá de dambes llingües na institución”, espliquen nun comunicáu, nel que tamién feliciten a Gotor y Andrés pol usu del asturianu na campaña eleutoral pese a qu’ésti ye tovía pequeñu.