Wolfe: “El Liet representa una oportunidá pa la mio banda y pa la música y la llingua asturiana”

Asturiana Mining Company convirtióse na sesta formación en ganar el Premio al Meyor Cantar gracies a la vaqueirada ‘Si nun conoces Vaḷḷouta’’. Michael Lee Wolfe (Pittsburgh, 1962) ye’l fundador d’esti grupu folk asturianu.

‘Si nun conoces Vaḷḷouta’…
 
"Si nun conoces Vaḷḷouta nun digas conocer´l mundu", una frase netamente asturiana por actitú y conteníu. Ye una lletra que nos quedó perguapa. Como diz la cancion, Vaḷḷouta ta "... a la vera’l Carrielḷḷu onde los clavos de Cristu / saliéronse del maderu...".
 
Norabona pol premiu. ¿Qué significáu tien pa una banda con casi 15 años de vida esti reconocimientu?
 
Ye dalgo prestoso. Col tiempu yá veremos si’l premiu, xunto col Liet International Contest, que se celebrará en Xixon esti añu, representa una oportunidá pa la mio banda, pa la musica asturiana y pa la llingua asturiana.
 
Nun ye nada fácil llevase un gallardón como’l del Premiu al Meyor Cantar.
 
Lo d’acabar ganando considérolo bona suerte. Los otros grupos vinieron mui bien ensayaos y bien armaos con canciones perguapes. Ellí taba Alfredo González con una seición de vientos potente; tamién, a nivel personal, gustóme mucho Macadamia, pero hai que destacar qu’hubo propuestes mui interesantes que nun llegaron a ser finalistes.
 
¿Qué cree que vio’l xuráu en ‘Si nun conoces Vaḷḷouta’ pa decantase por esti cantar?
 
Home, ¡una banda con 4 muyeres arropando asina al vieyu gaiteru –con permiso– Varillas ye bon espectáculu! Llueu, dixéronme que tuvimos la suerte de tener un bon soníu naquel momentu de la gala, qu’al ser en direutu y televisada, nun ye fácil consiguir. A parte d’eso, la cancion ye una vaqueirada, qu’a mi m’encanten. Grabéles en dellos cedés: ‘Ubiña’, en ‘Patrimoniu’, el primeru de la Mining y una de les mios canciones favorites de tola mio discografía; y en ‘Torner’, con Ástura, Berto y Anabel. En ‘Anabel Santiago canta a Diamantina Rodríguez’tamién hai coses asina. Y agora tenemos Vaḷḷouta.
 
Esti tema ta incluyíu nel segundu álbum d’Asturiana Mining Company, ‘Sones por Berto Velasco’. ¿Qué tal recibimientu ta teniendo?
 
De momento ta teniendo un bon ritmu de ventes y lléguenme bastantes comentarios positivos.
 
¿Qué van atopar les persones que tengan ente manes esti trabayu?
 
Nel mio cuartu de sieglu llargu equí daprendí que la musica asturiana tien una llarga y rica tradición que ye fundamentalmente vocal. Pa cantar. De fechu, de tola vida la masa social alrededor de la tonada, y llueu de los coros y los ochotes, ye muncho mas grande que la que ta alredor del folk asturianu. En verdá, el folk asturianu nun tien masa social. Y son muchos años y cedés como pa buscar por qué tovía nun la tien. Dame muncha rabia que nun se sienta práuticamente musica asturiana n’Asturies. La crisis que hai nestos tiempos ye un bon puntu de partida pa camudar esta cuestión. Y con eso quiero dicir que l’Asturiana Mining Company fixo una grabación pensando nel públicu asturianu; dalgo que, oxalá, y ante too, gustase en toda Asturies y sonara nesta rexón. Asina que fiximos un CD popular, con arreglos vocales espectaculares, como pa convidar a tol mundu que cantara con nós.
 
El trunfu nel Premiu al Meyor Canta va permitivos representar a Asturies nel Liet International. ¿Qué supón pa vusté, d’ascendencia estauxunidense, participar nesti certame enarbolando la bandera de la llingua asturiana?
 
Ganar un premiu sí que ye más o menos nuevo pa min, pero defender la musica y la llingua asturiana, en cambio, nun lo ye. Dende’l puntu de vista musical, ye una responsabilidá importante. Tán reinvidicándose con fuercia llingües minoritaries en toda Europa y esti festival ye una de les manifestaciones culturales más importantes del movimientu. Nun taría de más aprovechar la oportunidá de poder xubir un poco l’autoestima cultural y llingüística asturiana. La plataforma del Festival Liet ye grande.
 
¿Ye una motivación estra pal grupu que’l Liet tenga llugar en Xixón esti añu?
 
Home, claro. Dicen que ganalo en casa ye enforma difícil, pero entá asina van poder ver a la banda mucha xente, equí y fuera. Y, oiga, ¡pa eso tamos!
 
Echando una güeyada al pasáu, ¿cómo foron los primeros pasos d’Asturiana Mininig Company?
 
Nel 1997, cuando la banda Xaréu decidió recoyer los trastos –frase del ingles, esto ye, retirase–, alcontréme con un montón d’idees musicales y demás. Púnxeme a buscar xente. De Xaréu vino a la Mining l’acordionista Marga Lorences quien, como sabe, más tarde foi miembru fundadora de la Bandina´l Tombo. Entos d´aquella, topéme con un home del que sabía dalgo del so llargu historial y al que tenía muncho respetu. Con él terminé faciendo un montón de proyeutos; y los que queden. Refiérome al percusionista Manuel Cordero. Depués de trabayar tantos años con Marta Arbas, dime cuenta que quería siguir con muncho canto na banda. Tardamos un poco en dar cola nuesa estrella, pero al fin conocí a Varillas cuando tenia 17 años –¡hai que ver como son los gaiteros buenos a los 17!– y sustituyó a Xuacu n’Ubiña nel festival d’Ortigueira, ente otros conciertos que fixo. Supe pronto que dibamos poder, polo menos, sonar bien. Hubo mas xente, como los hermanos Cabeza, Nacho y Luigi al baxu y batería, Xaime Arias al piano y los demás, pero nun quiero aburrir como´l güelu.
 
¿Cuál ye l’orixe del nome de la banda?
 
Esto ta escritu nel libreto de ‘Patrimoniu’, primer CD de la Mining: “Nel 1840, l’inxenieru inglés John Manby vino a Asturies comisionáu por un grupu de financieros británicos pa informar sobre los yacimientos hulleros del Principáu d’Asturies. Como resultáu del so informe favoratible, fúndase nel añu 1844 la compañía Asturiana Mining Company, col oxetivu d’esplotar mines de carbón y crear establecimientos siderúrxicos. Dende esi momentu, Asturies convirtióse na tierra prometida pa miles de trabayadores que, dende toes partes, dirixeron los sos pasos hacia les cuenques mineres. La fiebre del oru dirixiólos hacia California y Alaska; la fiebre del fierro hacia Gales y el sur d’Alemaña; y la fiebre del carbón conduciríalos hacia les tierres del sur d’Asturies”. El casu ye que la empresa del Sr. Manby duró unos cuatro años, pero sentó la base de lo que güei ye Hunosa.
 
Nel 2000 sacaron el so primer discu, ‘Patrimoniu’, que nun tuvo continuidá hasta ‘Sones por Berto Velasco’. ¿Por qué tanto tiempu ente los dos trabayos?
 
Ésta ye una entruga que siento munches vegaes y la historia ye la siguiente: Ente ‘Patrimoniu’ y ‘Sones Por Berto Velasco’tán unes cuantes grabaciones que son, d’una manera o otra, de la Mining. El cuartetu Ástura formóse con un cuartetu de la Mining: asina, Varillas, Marga Lorences, Cordero y yo y grabamos ‘Tradición’. Llueu, Ástura fixo, xunto a Anabel Santiago, la grabación ‘Torner’. Pel medio taba la nuesa primer incursión en montaxes d’espectáculos específicos y xiramos, xunto a Liliana Castañón, Urbano Prieto y Anabel con ‘Nel camin’. Los otro discos que produxi xunto a Anabel Santiago, ‘Anabel Santiago canta a Diamantina Rodríguez’ y ‘Desnuda’,foron en realidá cola Mining Company d’acompañamientu. Depués de grabar ‘Desnuda’ foi cuando entró en too esto les GPS: Gema Fernández, Puri Penin y Silvia Fernández. Trabayaron como coristes en direutu pa les canciones de ‘Desnuda’. Esta collaboración ta dando muncho frutu yá que güei les GPS y yo tenemos dos proyeutos en comun: ún ye’l de The Pink Rangers, onde nos dedicamos al country y al blues con un estilo tan tradicional como cañeru, y l’otru ye’l de l’Asturiana Mining Company.
 
¿Cómo evolucionó la banda nesti tiempu?
 
Un amigu de los mios tiempos n’U of M (University of Michigan) dicía enantes de marchame pa Europa, España y Cualloto que yo yera un estudiante eternu. Va ser que tenía razón. Lo malo ye qu’ún nun acaba de ser tolo profesional que quixera, pero lo bono ye que tas evolucionando tol ratu y estos últimos 15 años que-y cuento foron bastante entamanaos en cuanto a la evolución de la música que facemos. En principio, la intención yera facer sonar la gaita lo más guapa y arropada posible. Depués volvímonos mui tradicionales, cosa mui recomendable pa inspirarse. Llueu compré un dobru como’l que toca’l maestro Jerry Douglas y quería emular un poco’l so trabayu colos Chieftains, como pue comprobase cola versión de ‘La madre del mineru’ que grabé con Anabel. Y asina ún tres otru... Tamién he de reconocer que trabayar en delles histories al llau del pianista Jacobo de Miguel ye una esperiencia mui evolucionadora. Ye mui creativu, virtuosu y paez que se lo sabe too.
 
¿Cuála ye la formación actual d’Asturiana Mining Company?
 
Asturiana Mining Company somos tolos músicos que grabamos ‘Sones por Berto Velasco’: Berto Varillas (voz, flautes y gaita), Maraya Zydeco (acordión),Silvia Fernández (baxu y coros),Gema Fernández   (coros),Puri Penin (coros y percusión), Sergio Pevida    (batería y percusión), Simón San José (percusión) y yo mesmo (guitarra y voz).
 
¿Qué planes tien vusté en mente a plazu curtiu?
 
Esta seronda pasada fixi una llocura al grabar dos cedés al mesmu tiempu: ‘Xota pa tres’, de De Miguel, Wolfe y Quintana; y el de la Mining. Tamos contentos colos resultaos de dambos, pero nun voi a recomendar la esperiencia... Dende la mio oficina tamos intentando dar a conocer los dos trabayos col fin de siempre, que ye buscar conciertos. En verdá, la música ta en crisis perpetuo. Durante unos cuantos años hubo presupuestu dende les instituciones como pa tapar esti fechu, pero agora toca salir y vender el productu al publicu asturianu y al publicu en xeneral. Esto nos tendrá bien ocupaos el restu d’esti añu y, ‘god willing’, nel 2013 también. Otra manera, prestaríame recordar a los llectores d’Asturies.com que De Miguel, Wolfe y Quintana presentamos ‘Xota pa tres’ nel Teatru Filarmónica’l sábadu 31 d’esti mes de marzu. ¡Sería perguapo ver tolos asientos ocupaos!
 
¿Cuándo vamos poder sentir ‘Si nun conoces Vaḷḷouta’ en direutu?
 
En mayu paez ser que taremos en Portugal y en Còrsica. Tamién tamos intentando entamar una xira per Asturies pa promover precisamente’l Meyor Cantar y el Liet International Contest.