Los sindicatos mayoritarios convoquen una fuelga xeneral pal xueves 29 de marzu

El Conseyu Federal de CC OO y el Comité Confederal d’UXT decidieron convocar una fuelga xeneral pal 29 de marzu, xueves. D’esta forma, los sindicatos mayoritarios quieren mostrar la refuga de la población a la reforma llaboral.
 
Tres la convalidación del decretu llei de la reforma llaboral de Mariano Rajoy, aprobada ayeri nel Congresu colos votos a favor de PP, Foro de Ciudadanos, CiU y UPN, CC OO y UXT respuenden güei con esta midida qu’espera concitar más ésito que la fuelga xeneral última, celebrada’l 29 de setiembre del 2010 contra la reforma llaboral de José Luis Rodríguez Zapatero. Ésta tuvo mui poco siguimientu nel Estáu, anque sí n’Asturies, territoriu onde’l 87 por cientu de los trabayadores apoyaron el paru.
 
Nesta ocasión, Euskadi y Navarra tamién van sumase a la fuelga, yá que la convocatoria de CO OO y UXT coincide na mesma xornada na que los sindicatos nacionalistes tienen previsto celebrar un paru xeneral.