Foro apoya nel Congresu la reforma llaboral de Mariano Rajoy

El Congresu aprobó esti xueves la convalidación del Real Decretu de la reforma llaboral del PP col sofitu de 197 diputaos, ente ellos el de Foro de Ciudadanos. Los populares tuvieron tamién los votos favorables d’UPN y de CiU.
 
Tanto PSOE como Izquierda Plural, PNV, UPyD y el restu del Grupu Mistu, hasta un total de 142 diputaos, refugaron el decretu, qu’abarata y facilita’l despidu, y acaba cola ultractividá –prórroga automática– de los convenios coleutivos. Amás, garantiza "mayor flexibilidá" a la hora de fixar salarios y xornaes, y crea un contratu indefiníu nuevu pa empreses de menos de 50 trabayadores que contraten a menores de 30 años.
 
Una vez convalidáu'l Real Decretu de la reforma llaboral impulsada pol Executivu de Mariano Rajoy, los grupos aceptaron por unanimidá la so tramitación como proyeutu de Llei. D'equí p'arriba, va abrise un primer plazu d'enmiendes a la totalidá, que tendría que dir acompañada d'un testu alternativu, y parciales. Los socialistes yá tienen anunciada la so propia propuesta alternativa que, según avanzaron, va basase na reforma fecha nel 2010 pol Gobiernu de José Luis Rodríguez Zapatero –contra la que se convocó una fuelga xeneral– y nel acuerdu algamáu polos axentes sociales a últimos de xineru en rellación cola moderación salarial y la negociación coleutiva.
 
Cuando se sepa qué cambios acepta'l Gobiernu –que yá avanzó que nun va modificar l'exe central de la reforma–, los socialistes van decidir si presenten un recursu ante'l Tribunal Constitucional (TC), una opción que la Izquierda Plural quier adoptar yá contra'l mesmu decretu llei, pero que requier reunir polo menos 50 diputaos. Amás, tanto CiU como dellos partíos catalanes con representación na Generalitat (PSC,ICV-EUiA, ERC y SI) presentaron dos solicitúes ante'l Conseyu de Garantíes Estatutaries de Catalunya pa qu'estudie si la reforma invade competencies en materia d'autoridá llaboral.
 
Esti domingu hai convocada delles manifestaciones en protesta contra la reforma llaboral plantegada pol PP convocaes por CC OO, UXT y USO. N’Asturies, la marcha va celebrase en Xixón, con salida al meudía de la plaza de toros d’El Bibio. Los sindicatos tán meditando la posibilidá de convocar una fuelga xeneral contra la reforma, previsiblemente pal 29 de marzu.