Wert niega a Asturies los sos documentos históricos por nun solicitar a tiempu la so restitución

El ministru d’Educación, Cultura y Deporte, José Ignacio Wert, señaló nel Senáu qu’Asturies nun pue recuperar los sos documentos históricos por nun solicitar a tiempu la so restitución. A cambéu d’ello, ufre reproducciones.
 
Wert respondió una entruga del senador de Foro Asturias Ciudadano (FAC) Isidro Manuel Martínez Oblanca, perteneciente al Grupu Mestu, sobre la fecha prevista pol Gobiernu estatal para restituyir a Asturies los sos fondos documentales de la Guerra Civil que, según comunicación oficial del Ministeriu de Cultura anterior, nunca se treslladaron dende’l Centro Documental de la Memoria Histórica (CDMH) en Salamanca, onde taben depositaos. El ministru recordó que ye’l Real Decretu del 26 d’avientu del 2008 el que regula’l procedimientu a siguir pa la restitución a particulares de documentos prindaos con motivu de la Guerra Civil y que nél s’establecen unos plazos: "si se cumplieren pol Gobiernu d’Asturies, los documentos devolviérense nel 2009; como nun foi asina, nun se pudieron devolver", indicó.
 
Martínez Oblanca señaló que nel Centro Documental de la Memoria Histórica hai depositaos miles d’escritos, carnés y papeles que formen parte "presuntamente" del patrimoniu documental asturianu y aclaró que, según los trabayos del investigador Policarpo Sánchez, esisten sospeches de que’l Gobiernu "foi oxetu d’engaño por parte del Ministeriu de Cultura anterior". Al respeuto, señaló que l’entós direutor xeneral del Llibru, Archivos y Biblioteques "negó de forma rotunda y escrita que los fondos se treslladaren a Catalunya" y añadió que too apunta a que "esta negativa ye falsa". "Ye imposible solicitar la restitución d’unos fondos documentales sobre los que’l Ministeriu de Cultura falseó la so situación y que güei tán en paraderu desconocíu", añadió.
 
El senador pola Xunta Xeneral insistió en qu’agora "procede averiguar si los fondos que formen parte del patrimoniu documental asturiano tán nel Archivu de Salamanca o si foron oxetu de treslláu total o parcial a Catalunya" y considera qu’hai que determinar "si l’escritu remitíu al Gobiernu autonómicu’l 5 d’ochobre pasáu respuende a la realidá de los fechos o ye un engañu inaceptable". Por último, señaló que ye preciso "restituyir cuanto antes la totalidá de la documentación al pueblu asturianu".
 
“Nun hai otra alternativa" al espirar los plazos
 
Pela so parte, el ministro reiteró qu’esiste un trípode llexislativu que regula la cuestión: la Llei de Memoria Histórica (2007), la Llei de Restitución de Documentos a Catalunya (2005) y el Real Decretu de Restitución a Particulares (2008). "Hai un réxime de plazos y de tramitación de les solicitúes que debe tener llugar", destacó. D’igual forma, recordó qu’Asturies tien una Llei de Patrimoniu Cultural "que prevé la reproducción de documentos que formen parte del patrimoniu asturianu pa que, de nun poder tener los orixinales, tales reproducciones sirvan a los fines de dicha llei".
 
Pa finar, Wert achacó l’asuntu "a un problema deriváu probablemente d’un error de catalogación d’una parte non significativa d’esos fondos" y afirmó que’l Centro Documental de la Memoria Histórica "fai’l so trabayu de manera minuciosa y sigue normes procedimentales riguroses". "Entiendo l’ interés del Gobiernu del Principáu, pero tendría que solicitalo nel 2009. Cuando espiren los plazos nun hai otra alternativa que la que prevé la Llei del Patrimoniu Cultural asturianu", concluyó pa, de siguío, ufrir la "disponibilidá absoluta" del so departamentu pa que se faigan copies esactes de los documentos asturianos.