El Congresu da prioridá a la variante de Payares, pero nun concreta la fecha pal fin de les obres

La conclusión de les obres de la variante de Payares ye una prioridá pal Congresu nesta llexislatura, pero’l PP refuga poner fecha pal fin de les mesmes. El partíu del Gobiernu estatal y el PSOE acusáronse mutuamente de los retrasos.
 
Na sesión de güei, los grupos popular y socialista presentaron dos proposiciones non de llei ante la Comisión de Fomentu de la Cámara baxa sobre la situación de la variante de Payares, infraestructura proyeutada en tiempos de José María Aznar y que tovía nun s'inauguró. Asina, la diputada y candidata del PP a la presidencia del Gobiernu, Mercedes Fernández, defendió la so iniciativa, na que se comprometen a "promover les actuaciones necesaries pa iguar defectos y demores" y tamién a "informar de toles esviaciones presupuestaries" que se produxeron n'exercicios anteriores.
 
Amás, aceptó les enmiendes plantegaes por Izquierda Plural (IX-ICV-CHA) rellatives a ufrir en puya y executar los tramos de Lleón-La Robla y La Pola Ḷḷena-Xixón, asina como pa que se caltenga’l tren Alvia actual ente Asturies y Madrid, amás de pa trabayar en pro de la superación del retrasu de casi media hora qu'esti añu se produz en Lleón. Na mesma llinia, el PP dio lluz verde a una enmienda de Foro de Ciudadanos pidiendo que se confirme la categoría europea d'alta velocidá pa tol corredor y que se proyeute y estableza transitoriamente la estación de cambiu automáticu d'anchu de vía de La Pola Ḷḷena hasta que se camude l'anchu en tol percorríu.
 
Por contra, Fernández refugó les enmiendes que "suponen una fixación clara y concreta d'un calendariu" p'acabar el proyeutu. "Pero non porque nun tengamos vocación de facer la obra, sinón porque simplemente nun tenemos criterios pa fixar el calendariu onde ellos lo establecen", xustificó. Y ye que tanto Izquierda Plural como Foro reclamaben al Gobiernu que se comprometiera a finar obra antes de que termine l'añu pa que la llinia pudiera tar funcionando a primeros del 2013. "El compromisu ye de máxima prioridá dientro de les disponibilidades presupuestaries que los anteriores gobernantes dexaron maltreches abondo", atayó la diputada del PP. Amás, la candidata popular pal 25-M reprochó a los socialistes que "votaren de forma repitida y provocadora" contra la variante ferroviaria, "negando a Asturies el progresu y la modernidá", y qu'agora "esixan plazos a los demás" cuando’l Gobiernu estatal anterior incumplió una tres otra les feches d'inauguración que foi dando.
 
Pela so parte, el diputáu socialista Antonio Trevín acusó a los populares de nun apostar por esta infraestructura nos sos presupuestos, defendiendo que foi l'Executivu de José Luis Rodríguez Zapatero'l que dio un impulsu definitivu a la so construcción nos ocho años últimos, dexando pendiente namás "los equipamientos y dellos remates". "Pal PP y otres dereches asturianes, los socialistes yéramos los enemigos de la variante, pero ocho años depués ehí ta. Ye cierto que nun ta acabada, pero nun-y pidimos al Gobiernu milagros, sinón que siga col ritmu d'inversión de los años últimos, o hasta un poco menos, porque con ello los trenes podríen tresportamos d'Uviéu a Madrid en dalgo más de trés hores yá nel 2013", defendió.
 
El diputáu d'IX por Asturies, Gaspar Llamazares, retrucó a dambos dirixentes que "agora nun val que mos llancemos unos a otros la dovela que punxo’l Gobiernu de José María Aznar o'l furacu –utilizó la pallabra asturiana– de Zapatero", sobremanera porque asina ye fácil "abondar nel cinismu". "Güei'l Gobiernu propón una iniciativa esixente col pasáu y bien poco col futuru, y la oposición plantega lo contrario", apuntó. Asina, defendió que la construcción d’esta infraestructura "imprescindible" ye yá "una cuestión de país", pa la que fai falta "sumar fuerces polítiques" pa la so conclusión. "Esta obra nun ye cualquier obra; ye una de les poques que s'aprobó por llei nel Congresu. Asina que la so execución ye una obligación bien importante", insistió.
 
A lo último, el diputáu de Foro, Enrique Álvarez Sostres, criticó a los socialistes, a los qu'agora-yos entren "les prieses" por saber "por qué siguen pendientes" les obres, cuando esti asuntu "nun quitó'l suañu nin un solu minutu a los gobiernos socialistes, nun siendo pa llanzar una xigantesca propaganda a los asturianos". Pela so parte, llamentó que la incitativa del PP "incurre otra vuelta en falta de concreición" al nun incluyir plazos, y reclamó-yos "más decisión política (y menos) iniciatives parllamentaries retóriques" si quier llevar esti proyeutu a bon puertu. A lo último, acusó a los dos partíos mayoritarios de protagonizar "una gran farsa de corte eleutoral", deseando asina que "esa sensibilidá nun se pierda tres el 25 de marzu".