Los universitarios aconceyaos n’Uviéu refuguen la financiación privada de centros públicos

Esta fin de selmana tuvo llugar n’Uviéu un alcuentru interuniversitariu nel que participaron alredor d’un centenar d’estudiantes de 25 universidaes. Los asistentes refugaron la financiación privada de centros educativos públicos.
 
L’oxetivu d’esti alcuentru entamáu pol Conseyu d’Estudiantes de la Universidá d’Uviéu, continuidá a los yá celebraos dende payares del 2010 en Sevilla, en dos ocasiones, y Almería, yera trazar les llinies de futuru de la universidá pública. Asina, per dos xornaes, los miembros de conseyos d’estudiantes y delegaciones, y los activistes estudiantiles desplazaos a Asturies, celebraron dellos debates al rodiu de la financiación y gobernanza “d’unos centros públicos que tán esperimentando un desaniciu progresivu qu'amenaza la Universidá Pública como ente social”.
 
Nes reuniones del vienres y sábadu, los estudiantes universitarios alcordaron amosar el so refugu a la financiación privada de los centros educativos públicos. “Esta disconformidá afítase nel rechazu total a les beques-préstamu en pro de les beques de renta y el so control fiscal pa evitar el fraude nes mesmes. Otra de les reivindicaciones foi la conxelación y amenorgamientu progresivu de les tases universitaries que los y les estudiantes han pagar, incluyendo les que s'apliquen en segunda y tercer matrícula”, señalaron dende’l Conseyu d’Estudiantes de la Universidá d’Uviéu nun comunicáu. Mentes, no que respeuta a la gobernanza de les universidaes públiques, los universitarios camienten “qu'hai un gran hermetismu nes xuntances y decisiones de los Conseyos Sociales. Poro, esíxese l'apertura de les sos puertes al públicu”. Arriendes d'esto, consideren qu'estos órganos “suponen un frenu a la participación democrática de la población d'estudiantes y, por esto, cuestionen la so esistencia nestes condiciones”.
 
Pa finar, confirmen qu’estos alcuentros interuniversitarios van tener continuidá nos meses próximos pa siguir afitando les bases “d'un movimientu estudiantil sólidu que defenda los derechos de la Comunidá d'Estudiantes”. Tamién van ponese en marcha campañes empobinaes a defender la educación pública y conviden a tolos estudiantes a sumase a elles.
 
Na semeya, un momentu d'una de les reuniones celebraes esta fin de selmana n'Uviéu.