‘Samartín de les tortielles’, eventu gastronómicu col asturianu como protagonista, da aniciu esti vienres

Samartín del Rei Aurelio acueyu un eventu gastronómicu nuevu col asturianu como llingua vehicular. Ye ‘Samartín de les Tortielles’, que principia esti vienres y que va allargase hasta’l domingu cola participación de 19 establecimientos.
 
Tres l’ésitu de ‘Samartín del Pinchu’, celebráu n’ochobre del 2010 y 2011, con más de 10.000 pinchos vendíos en dos ediciones, los Empresarios y Comerciantes de Samartín del Rei Aurelio (ECOSAM) entamen un eventu gastronómicu nuevu dedicáu a les tortielles. Asina, 19 chigres de Blimea, L’Entregu y Sotrondio presenten otres tantes creaciones diferentes tomando como base la clásica tortiella cola pretensión de sacar a los habitantes de tola cuenca del Nalón a la cai.
 
Los veceros van tener especial protagonismu nesti eventu gastronómicu, yá que van facer de xuraos previa degustación de cuatro tortielles de cualquiera de los chigres concursantes. Amás, los comerciantes de Samartín van sortiar dos vales de 100 euros en compres ente les persones que se decidan a entregar la so papeleta sellada nes urnes repartíes polos establecimientos participantes.
 
Al igual que nel certame dedicáu al pinchu, la organización propón rutes pa que los interesaos nun se pierdan nenguna de les tortielles orixinales que presenten los chigres de ‘Samartín de les tortielles’. Asina, la primer d’elles, per Sotrondio y Blimea, saldría del Mesón La Cabaña (Tortiella d’arenque envuelta en pimientu sobre salsa Tapenade) pa pasar depués per Les Carboneres (Tortiella de picadiellu al quesu de Pría) y Casa Josefina (Tortiella panadera) enantes de tirar pa Blimea, onde poder facer parada an Sidrería Crespo´s (Milfueyes de tortiella, tierra, mar y campu), Sidrería San Mamés (Tortiella afumada con torrendos de bacon, gula y pimientu), Café Peña Mayor (Pastel de tortiella con bacaláu y xampiñones), Café El Secañu (Tortiella Secañu) y nel Café El Cascayu (Tortiella de ropa viejo).
 
La otra ruta céntrase namái en L’Entregu y comienza nel Bar La Güestia (Tortiella de sardina salona guisada), pa siguir llueu na Sidrería La Tená, n’El Coto, (Tortiella al gochu con quesu gratináu), Cervecería Tom Malory (La rellena del Cantábricu), El Ocho de Chapó (Tortiella del Ocho), Vinoteca Bakvs (Tortiella materna), Sidrería La Conda (Tortiella al quesu Feta), Sidrería Casa del Pueblo (Tortiella de bacaláu con pistu), Vinoteca Domoe (Tortiella Domoe), Sidrería El Zamorano (Tortiella de bacaláu frescu) y Sidrería La Laguna del Rio III (Tortiella con carne de centollu), p’acabar na Sidrería El Puente (Tortiella El Puent). Los que prefieran facer una ruta al so gustu, van poder guiase al traviés de los gastromapas que se reparten en cualquiera de los chigres participantes.