Bloque-UNA-LV-GV encamienta a les alministraciones a nun aplicar la reforma llaboral del PP

Rafael Palacios, candidatu del Bloque-UNA-LV-GV a les eleiciones del 25-M, encamentó a toles alministraciones a nun aplicar la reforma llaboral del PP. Conseña que garantizar l’emplegu públicu ye la meyor arma contra esta midida.
 
Pa la coalición, la non aplicación de la reforma llaboral “ye la meyor forma pa enfrentase” a ella y, asina, poder atayar “na midida de les posibilidaes del sector públicu, les nefastes consecuencies que va trayer a millones de persones del Estáu español”. Palacios considera básico que los ciudadanos, polo xeneral, y los trabayadores, en particular, “vean cómo se pue xestionar eficientemente ensin facer cayer tola carga de la crisis sobre los de siempre, demostrando qu'esta reforma namás busca retayar derechos, non ameyorar la eficiencia del sistema productivu”.
 
Asina, Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) va incluyir nel so programa eleutoral “la non aplicación de la reforma llaboral en toles alministraciones públiques asturianes, y un compromisu pa nun collaborar con nengún gobiernu que l'aplique a los sos trabayadores”. D’igual forma, la coalición encamienta a toles formaciones que “afirmen tar en contra de la reforma llaboral, que se sumen a esti compromisu o, sinón, va vese que la so oposición a tal reforma ye namás de pallabra y, qu'en casu de gobernar, tán dispuestos a aplicalo n'Alministración y empreses públiques”, y eso, según Palacios, “hai que dicilo a los votantes enantes de les eleiciones. De lo contrario, oponese a la reforma ye un actu de cinismu políticu”.
 
Por últimu, el candidatu a la presidencia del país, qu’apunta que la so formación ta estudiando la posibilidá de “sofitar a les empreses qu'apuesten pola calidá y estabilidá del emplegu, frente a aquelles que faigan tolos sos axustes vía salario y despidos”, concluyó que “Asturies nun tien que ser namás un sentimientu pa utilizar enantes de les eleiciones y escaecese d'él cuando los ciudadanos yá votaron, sinón una realidá política y social que se reflexe en mayores derechos y prestaciones día ente día y pa toes y toos, lo qu'esixe un mayor grau d'autonomía política y financiera pa defender a les asturianes y asturianos de los ataques al Estáu de Bienestar que se tán faciendo dende Europa y España”.
 
Otra manera, nun comunicáu asoleyáu ayeri, la coalición señaló que quier que la campaña eleutora sirva de “enmienda a la totalidá” al problema de la deuda pública, pa depués asegurar que la deuda nun ye’l problema, sinón “quién ta beneficiándose de la mesma”.