Disidentes del IRA maten a dos soldaos y un policía en menos de 72 hores

L’Ulster ta reviviendo nes últimes hores episodios que yá paecíen escaecíos y que recuerden a los sos peores momentos de violencia política. Si’l sábadu una escisión del Exércitu Republicanu Irlandés asesinaba a dos soldaos británicos nuna base militar d’Antrim, ayer pela nueche un policía norirlandés resultaba muertu d’un disparu en Craigavon. La paz precaria algamada hai una década puede peligrar n’Irlanda.

Si’l sábadu yera una escisión del IRA autodenominada Real IRA (“IRA Auténticu”) la qu’asesinaba a dos soldaos británicos nuna base militar nel condáu d’Antrim, ayer pela nueche otra escisión denominada Continuity IRA (“IRA de continuidá”) mataba d’un disparu na cabeza al oficial de la policía norirlandesa de 48 años Stephen Paul Carroll nel pueblu de Craigavon, nel condáu d’Armagh.

Esti aumentu cualitativu de la violencia na Irlanda baxo alministración británica supón un elementu que puede desestabilizar la zona de forma tala que puede peligrar seriamente l’alcuerdu de paz ratificáu nel añu 1998 y que supunxo l’abandonu de les armes por parte del Exércitu Republicanu Irlandés y de los principales grupos paramilitares protestantes probritánicos, así como la participación política nes instituciones autonómiques de católicos y protestantes por igual.

Sicasí, el primer ministru británicu, Gordon Brown, señalo tres l’atentáu del sábadu que “nengún asesín va acabar cola paz”. Les reacciones de les fuerces polítiques del Ulster fueron na mesma dirección, incluyíu’l Sinn Féin, brazu políticu del IRA.

LES CLAVES DE LA SITUACIÓN

Dos son les claves nel conflictu anguaño. Per un llau saber si tamos delantre d’una violenta ofensiva por parte del republicanismu irlandés disidente de la llínia oficial del Sinn Féin y del IRA, esto ye, si ye l’entamu d’una vuelta a la violencia a gran escala por parte d’un sector importante de los partidarios de la reunificación de la islla, o ye un episodiu pasaxeru d’unes escisiones con poco sofitu na población católica.

La segunda clave, muncho mas importante, ye si’l sector mayoritariu del republicanismu irlandés representáu hasta agora pol Sinn Féin tien la capacidá d’exercer un control auténticu sobre los sectores más descontentos con un procesu de paz qu’al so xuiciu nun paez que vaya traer la reunificación de les dos Irlandes, o si pola contra la situación puede marcha-y de les manes col posible resultáu d’una vuelta a un conflictu que nos últimos cuarenta años causó casique 4.000 muertos.

A esto hai que amesta-y la reacción del otru bandu en conflictu, la de los protestantes probritánicos, y la cuestión repítese. ¿Podrán los sectores mayoritarios del unionismu controlar los deseos de venganza de les sos facciones más violentes depués d’estos tres asesinatos?.