Asturies, Cantabria y Castiella y Lleón acuerden una xestión compartida "eficaz" de Picos y piden inversión

Los presidentes de les comunidaes autónomes d'Asturies, Cantabria y Castiella y Lleón, Vcente Álvarez Areces, Miguel Ángel Revilla y Juan Vicente Herrera, firmaron güei en Lleón el conveniu de collaboración pol que van xestionar de manera compartida y coordinada'l Parque Nacional de Picos d'Europa, onde aseguraron que se trata d'un espaciu "singular y únicu", polo que van reivindicar una mayor dotación presupuestaria per parte del Executivu central.
 
La firma del acuerdu va permitir disponer de diferentes instrumentos y mecanismos pa l'actuación conxunta: un Plan d'Ordenación de los Recursos Naturales, un Plan Rector d'Usu y Xestión, un Plan de Desarrollu Mantenible y un Consorciu del Parque Nacional de Picos d'Europa y un patronatu como órganu de participación, amás d'una Comisón de Xestión y un Comité Téunicu.
 
D'esta manera, cada comunidá va nomar a un codirector encargáu d'alministrar y executar les actividaes del Parque nel so territoriu. Los tres codirectores van rotar con una periodicidá añal pa exercer les funciones de director-conservador nel conxuntu del espaciu.
 
Miguel Ángel Revilla espresó la importancia del acuerdu soscritu, al dexar patente que penriba de les diferencies ideolóxiques de los titulares de les tres autonomíes existe una "clara vocación" de preservar esti espaciu col fin de que "nun cuerra riesgu" un territoriu "tan fráxil". "Güei tamos equí pa garantizar que Picos d'Europa va tar en bones manes. Ye un espaciu únicu y singular n'España con característiques especiales", recalcó.
 
Al respeuto, precisó que les particularidaes del Parque Nacionales residen en que nél conviven flora, fauna y núcleos poblaciones, amás d'apuntar que se trata d'un espaciu que foi "maltratáu" en cuanto a la so financiación, que según esplicó, foi "inferior" a la so importancia y al tráficu de visitantes que rexistra. "Agora se puen correxir eses desigualdaes pa que cuente cola inversión que-y correspuende; ye un espaciu únicu a nivel mundial", añadió.
 
Pela so parte, Vicente Álvarez Areces, espresó que la firma del conveniu demuestra que n'España existe una democracia "madura" y demandó a la sociedá que nun tenga "nengún mieu" de que l'espaciu va xestionase de magar esti momentu con "eficacia". "Somos conscientes de la nuesa responsabilidá. Seguro qu'asumimos el restu con brillantez y dende la collaboración", concretó.
 
Amás, sorrayó que se trata d'un "retu de futuru" medioambiental que s'inscribe nuna política necesaria pa enfrentase a l'actual crisis económica. "La salida de la crisis tien qu'acompañase de polítiques que miren al futuru", añadió.
 
De la mesma manera, Juan Vicente Herrera manifestó que la firma del conveniu supón una "oportunidá" pa tratar la planificación y la xestión d'un elementu "tan importante" del patrimoniu español. "Tamos convencíos dafechu de que, dende la cercanía, podemos facelo meyor pa nós. Ye una oportunidá; falamos d'un tesoru", aseguró.
 
"ESPECIALMENTE EXIXENTES" NA INVERSIÓN
 
Per otra parte señala que les tres comunidaes han ser "especialmente exixentes" na inversión demandada al Executivu central pal espaciu, dao que nun foi'l Parque Nacional "meyor atendíu" nos últimos años dende'l puntu de vista de la finaciación.
 
Igualmente, Areces indicó que la intención de les tres comunidaes ye solicitar a l'alministración central "un poco más" d'inversión pa esti espaciu natural. "Seguro que lo vamos algamar", afirmó.
 
Amás, Herrera aseguró que les autoridaes de Cantabria, Castiella y Lleón y el Principáu d'Asturies van tar "vixilantes" nesta cuestión.
 
PARTICIPACIÓN D'AYUNTAMIENTOS
 
Al entrugalos poles reivindaciones de los ayuntamientos inscritos dientro del espaciu protexíu, los titulares de les tres comunidaes aseguraron la participación de los núcleos poblacionales al traviés del patronatu. "Les tres comunidaes somos la meyor garantía de que los intereses van tar defendíos", esplicó Herrera.
 
Pela so parte, Revilla sorrayó que "penriba de too" tán les persones, polo qu'afirmó que los conceyos van escuchase, atendese y consultase.
 
Los tres presidentes señalaron como un fechu "fundamental" la tresferencia de les competencies a les autonomíes per parte del Executivu central demientres el presente añu.
 
Asina, coincidieron nel fechu de que l'acuerdu soscritu va permitir avanzar nel procesu de trespasu de les competencies del parque a les comunidaes autónomes al establecer los criterios comunes pa la planificación y xestión del conxuntu, col oxetivu de que los mesmos se respeten coles singularidaes llocales y garanticen la unidá ambiental d'esti espaciu natural.
 
Según esplicaron, esti conveniu ye'l "preludiu" de la tresferencia y solicitaron a la Presidencia de los Parques Naturales que trabaye con "rapidez" nesti asuntu pa que seya una realidá enantes de qu'acabe'l próximu branu. "Esti acuerdu nun ye un fin en sí mesmu; ye un pasu pa que se materialice'l trespasu de Picos d'Europa", precisaron.
 
DOCTRINA DEL CONSTITUCIONAL
 
Dende que se produxo la sentencia del Tribunal Constitucional que determinó que les competencies de xestión de los Parque Nacionales correspondíen a les comunidaes autónomes, Castiella y lleón, Cantabria y Asturies manifestaron repetidamente la so "firme voluntá" de cooperar pal caltenimientu de la unidá ambiental de Picos d'Europa.
 
L'aplicación de la citada sentencia exixe l'articulación d'apropiaos mecanismos de coordinación de la planificación y xestión de dicha figura de proteición, cola finalidá d'algamar los oxetivos de conservación qu'estableció la Llei 16/1995, de 30 de mayu, de declaración del Parque Nacioanl de los Picos d'Europa.
 
El primer principiu d'acuerdu prodúxose en mayu del 2005, fecha na que s'acordó la firma d'un conveniu de collaboración ente les tres comunidaes pa la xesión coordinada de los Picos d'Europa. Amás, el pasáu día 30 d'ochobre del 2008 los responsables de Mediu Ambiente de les autonomíes s'aconceyaron en Valladolid p'avanzar nuna posición común nel procesu de tresferencia de les competencies per parte del Ministeriu de Mediu Ambiente.
 
El Parque Nacional de Picos d'Europa ye herederu del primer Parque Nacional español, el de la Montaña de Cuadonga, declaráu nel añu 1918. Nesti momentu s'asienta sobre los tres macizos de la citada formación montañosa, espardíos pel territoriu de les comunidaes de Castiella y Lleón, Principáu d'Asturies y Cantabria.
 
Constitúi, amás, una unidá xeomorfolóxica y dispón d'unos ecosistemes de fauna y flora asociaos, de sistemes d'utilización del territoriu, asina como d'etnografía y cultura "fonderamente" interrellacionaos y "ayenos" a les llendes alministratives.