Iniciativa pol Asturianu denuncia la situación del idioma n’Uviéu

La supresión de la llingua asturiana na cartelería del programa ‘La nueche ye tuya’ foi calificada por Iniciativa pol Asturianu como un pasu atrás nuevu pal idioma n’Uviéu. El coleutivu recuerda que’l conceyu nun tien nin Serviciu de Normalización.
 
Esti programa d’ociu xuvenil venía utilizando, dende años atrás, la denominación billingüe ‘La nueche ye tuya-La noche es tuya’, pero na cartelería d’esti 2012 despaez l’asturiana pa dar namái protagonismu a la castellana. Yá l’añu pasáu, el pesu del idioma del país menguó, al tar les feches en castellanu y non nes dos llingües como n’ediciones anteriores. Pa Iniciativa pol Asturianu, esti fechu denota’l poco enfotu del Conceyu d’Uviéu pa col asturianu. “Si la normalización social del idioma, por parte de los socesivos equipos del gobiernu llocal yera yá bien probe y deficiente, nos últimos años tamos asistiendo a un desaniciu del asturianu en tolos sitios onde ganara un espaciu”, afirmen dende esti coleutivu de defensa del idioma, que pon como exemplu la desapaición del asturianu de web municipal va poco más de dos años.
 
D’igual forma, denuncia que’l segundu conceyu con más población del país “fai poco o nada por respetar la Llei d'Usu y por da-y puxu al idioma dende les instituciones”, como amuesa la falta d’un Serviciu de Normalización Llingüística o l’ausencia d’interés en recuperar la toponimia tradicional. Por esti motivu, Iniciativa pol Asturianu esixe a los responsables del Conceyu “qu'adquieran el compromisu de dar pasos nuevos nel usu d'un idioma que ye patrimoniu de toos”.
 
Primer congresu
 
Esti sábadu, a les 17 hores nel Auditoriu d'Uviéu, va tener llugar la celebración del primer congresu d'Iniciativa pol Asturianu. Esta Xunta Xeneral estraordinaria tiene como oxetivu la escoyeta de la Xunta Direutiva de l'asociación. Pa tener derechu a votar, ye necesario tar al corriente de los pagos.