Asturies escueye nel Teatru de la Llaboral el meyor cantar del 2011

Esti sábadu va tener llugar nel Teatru de la Llaboral, con entrada llibre, la gala del Premiu al Meyor Cantar. El cantautor Alfredo González y los grupos Asturiana Mining Company, Bacotexo, Macadamia y Xera aspiren a llevase esti gallardón.
 
La sesta edición d’esti premiu llega a Xixón tres tener a Mieres como sede y a Toli Morilla (2007), Herbamora (2008) y Skama la Rede (2011) como ganadores xunto con Alfredo González (2009) y Xera (2010), que podríen reeditar trunfu esti añu. El formatu va ser el mesmu del d’años anteriores, con una interpretación del tema preseleicionáu por parte de los artistes pa llueu dar pasu a la deliberación del xuráu escoyíu pa la ocasión, que va tar presidíu pol direutor xeneral de Política Llingüística, Alfredo Ignacio Álvarez Menéndez. Los cantares que van pelear pol gallardón, consistente nuna escultura de l’artista María Xesús Rodríguez que lleva’l nome de ‘El Pasco’, son ‘Si nun conoces Vaḷḷouta’, de l’Asturiana Mining Company; ‘L’altanera’, de Macadamia; ‘Campos de meiz’, de Bacotexo; ‘Yo quixera’, de Xera; y ‘Felina Bipolar’, d’Alfredo González.
 
Tres les actuaciones, y mentes el xuráu decide qué artista o banda ye merecedora del Premiu al Meyor Cantar, Skama la Rede, como grupu ganador del añu pasáu con ‘Condenáu’, va dar un conciertu. Darréu, daráse a conocer el nome del ganador, que tendrá’l privilexu de defender a Asturies nel Liet International, festival de la canción en llingües minorizaes que nel 2012, de nun haber novedá, va celebrase en Xixón a finales d’añu.
 
L’hora d’entamu de la gala, con entrada llibre, ye les 19 hores, anque les puertes del Teatru de la Llaboral van pesllase a les 18.50 hores pa nun entorpecer el trabayu de los operarios de la RTPA. L’ente públicu va restransmitir l’eventu en direutu, polo que la xente que tea fuera d’Asturies va poder siguir el desenllaz del certame per Internet.