K-Nalón actúa nel CSOA La Madreña na entrega del premiu de Xunta Moza ‘Demuestra’l to amor pola llingua’

El grupu de Delfo y ToRi, K-Nalón, va actuar esti xueves nel CSOA La Madreña nel actu d’entrega del premiu ‘Demuestra’l to amor pola llingua’ qu’entama Xunta Moza. Esta banda de hip-hop va contar cola collaboración especial de Dani Anti-Stylo.
 
La cita ta prevista pa les 21 hores nun espaciu recuperáu pa l’usu del pueblu como ye’l Centru Social Autoxestionáu La Madreña, qu’ocupa les instalaciones de la Conseyería de Salú vieya instalada na uviedina cai Xeneral Elorza. Nel actu, Xunta Moza va facer entrega de la tercer edición del premiu ‘Declara’l to amor pola llingua’, consistente en facer un rellatu cortu de non más de 140 carauteres –124 si la ferramienta utilizada pa concursar ye Twitter– pa declarase al asturianu coincidiendo con estes feches nes que tuvo llugar la celebración del Día Internacional de La Llingua Materna (21 de febreru). El ganador va recibir un llote de productos de la Xunta pola Defensa de la Llingua Asturiana (XDLA) y Xunta Moza, amás de llibros n’asturianu.
 
La estaya de mocedá de la XDLA agradez “la participación nesta tercer edición del concursu” y complázse, “non solo del ésitu nel númberu de participantes, sinón tamién de la calidá lliteraria de los trabayos presentaos”. D’igual forma, señala que con esti actu previstu pa güei en La Madreña, “quier poner de relieve les actitúes positives a favor del asturianu de la mocedá asturiana, frente a una clase política prexuiciosa y acomplexada pa con esta realidá social y que nun acaba d’asumir con naturalidá lo que ye un fechu incontestable: la esistencia de la llingua asturiana y la necesidá de dotar a los sos falantes colos mesmos derechos civiles que tienen los falantes d’otros idiomes”.