La sidra asturiana yá cuerre pela población bretona de Pleskob. Esti vienres entama’l XVI Roue Waroch, festival dedicáu esti añu a Asturies, con Tuenda, Menaxatrua Cuartetu y DRD como primeros embaxadores.
 
Asitiada a 60 quilómetros de Lorient/An Oriant y a unos 80 del puertu de Saint-Nazère, esti pueblu de 5.000 habitantes práuticament dobla la población na celebración del Roue Waroch, festival qu’atrae a xente del tol país. Nesta ocasión, el coleutivu organizador, Petra Neue, quinxo averar la cultura asturiana a los bretones, polo que dedicó la decimosestra edición del certame a Asturies. Asina, nestos trés díes, los habitantes de Pleskop y visitantes pueden disfrutar d’un chigre asturianu onde poder prebar les delicies gastronómiques del país y la sidra asturiana que tanto gusta per Breizh, amás de presenciar actuaciones en direutu de dalgunos de los meyores grupos de música tradicion, conocer les nueses dances y aldericar sobre la situación de la llingua bretona y asturiana.
 
La representación asturiana nel festival ta compuesta polos grupos Tuenda, DRD, La Bandina y Menaxatrua Cuartetu, a los qu’hai que sumar delles persones que van participar en dalgunes de les munches actividaes del festival. Los encargaos d’abrir el certame a primer hora van ser los trés integrantes de Tuenda con una clase práutica sobre la música tradicional asturiana. Yá de tarde, Menaxatrua Cuartetu va ufrir un conciertu que será preludiu de la Gran Nueche Asturiana, a partir de les 21 hores nel Bar Restaurant Allano, cola participación de DRD y Tuenda.
 
Les dances asturianes abrirán les actividaes del sábadu, con un cursín a cargu de Paulino García Santirso y María Vázquez Álvarez, mentes que Tuenda va repetir actuación a les 18 hores, nesta ocasión acompañaos de los malíes Vieux Farka Touré. Pa zarrar la xornada, a partir de les 20.30 hores, va tener llugar una folixa na que van participar La Bandina y DRD xunto colos bretones IMG, MoTa, Barou-Guichen, Frères Keravec y Kanerion Bro Boïo.
 
Na xornada final, Pleskop va poder disfrutar d’una xinta tradicional asturiana, amenizada cola música de Menaxatrua Cuartetu, a partir de les 12.30 hores, a la que va siguir una conferencia-dabate, a les 16 hores, entitulada ‘Bretagne/Asturies, comparación y estáu de la llingua asturiana y bretona nos dos países’. Un puntu y final escelente a la participación asturiana nun festival con un bon cartel en Breizh qu’axunta música, cultura y tradición.