Cultura diz que'l recorte nel presupuestu de l'ALLA vien de la necesidá d'establecer prioridaes

La Conseyería de Cultura y Deporte refirióse a la necesidá d’establecer prioridaes pa esplicar el recorte del 40 por cientu nel presupuestu de l’ALLA. Tamién llamentó qu’Ana María Cano nun esplicara que’l retayu nun yera definitivu.
 
Asina respondía la conseyería a les declaraciones de la presidenta de l’Academia de la Llingua Asturiana (ALLA), que'l martes fixo un llamáu públicu al presidente d'Asturies, Francisco Álvarez-Cascos, pa que torgara'l recorte de "un 40 por cientu del so presupuestu". Según Cultura y Deporte, el direutor xeneral de Política Llingüística, Alfredo Ignacio Álvarez Menéndez, púnxose en contautu con Cano pa informa-y que la partida de 167.900 euros que la conseyería previera pa l'ALLA veríase reducida "nun venti por cientu (134.320 euros)".
 
Mientres la conversación, según afirma’l Gobiernu, Álvarez Menéndez manifestó qu'esti presupuestu "nun yera definitivu" y que, "na midida de les posibilidaes que permite’l contestu actual de contención presupuestaria", la conseyería caltendría "intautes" les partíes destinaes a los servicios de normalización dependientes de los  conceyos y entidaes llocales, asina como la subvención a l'ALLA prevista nun primer momentu. Ante esta situación, dende Cultura y Deportes llamenten que Cano nun aludiera a estos compromisos mientres les sos declaraciones.
 
Sicasí, argumenten que la decisión atiende a "la necesidá de que'l Gobiernu estableza prioridaes" y aseguren que "la sociedá va saber valorar l'esfuerzu pa siguir calteniendo, a pesar de circunstancies económiques tan adverses, polítiques d'apoyu a toles instituciones y a tolos sectores sociales y económicos comprometíos na defensa y recuperación del patrimoniu cultural y llingüístico".