Una delegación de Xunta Moza viaxó hasta Brest pa intercambiar esperiencies con Ai’ta

La organización bretona Ai’ta celebró esti sábadu una xornada en Brest pa preparar la manifestación convocada’l 31 de marzu en dellos puntos del Estáu francés pa defender la llingua propia. Una delegación de Xunta Moza participó nel eventu.
 
La cita tuvo llugar en Brest y nella, amás de reprentación asturiana, hubo presencia d’un coleutivu de defensa del idioma galés, Cymdeithas yr Iaith Gymraeg. Ai’ta convidó a les dos delegaciones tres l’Alcuentru Internacional de Mocedá Europeo Falante de Llingües Minoritaries/Minorizaes celebráu en Gasteiz en xunetu col oxetivu d’intercambiar esperiencies y fortalecer una rede internacional de mocedá “que fala una llingua non promocionada dende les instituciones públiques”. Asina, Xunta Moza presentó’l sábadu una ponencia “na que fiximos una presentación de los ámbitos nos que trabayamos y cómo trabayamos”, esplica Llucía Menéndez Suárez, ún de les persones que conformaron la delegación asturiana.
 
Asina, el públicu presente na asamblea xeneral d’Ai’ta pudo conocer campañes como la recoyida de firmes por una radiotelevisión pública n’asturianu, el personaxe de la Pita, los encierros na Universidá por una enseñanza reglada del idioma o les fuelgues del estudiantáu de Secundaria por nun recibir clas d’asturianu. “Lo que más llamó l’atención foi la campaña de la Pita, que consideraron barata y efeutiva”, señala Menéndez Suárez. Tres esti alcuentru ente los trés coleutivos, yá de nueche, celebróse una Fest-noz a la qu’acudieron dellos centenares de persones, na so mayoría xente mozo.  
 
Pa la delegación asturiana desplazada a Brest, la esperiencia foi mui positiva y permitió “conocer problemátiques d’otros sitios, onde la llucha ye la mesma”, rellata Menéndez Suárez. Nel casu bretón, destaca l’actividá grande del coleutivu mozu nacíu nel 2005, con dos campañes fuertes entamaes, “una orientada a correos y otra a los trenes”, col oxetivu de potenciar l’usu del idioma llariegu nestes dos estayes. Mentes, no que respeuta a la situación del asturianu, esta militante de Xunta Moza asegura que-yos sorprendió “les desigualdaes grandes dientro del Estáu español no que respeuta a les llingües minorizaes, yá qu’ellos conocen más el casu catalán y vascu al ser idiomes que se falen nel territoriu francés”.
 
La collaboración ente Ai’ta y Xunta Moza nun va quedar namái nesti alcuentru, yá que’l coleutivu en defensa del bretón tien previsto unviar una delegación a finales d’abril a Asturies pa conocer in situ la vitalidá de la llingua asturiana. Asina, la intención de los miembros d’Ai’ta ye la d’acudir al Conciertu pola Oficialidá, que va celebrase’l 28 d’abril nun llugar tovía por confirmar, pa depués participar na manifestación del Día de les Lletres, el 4 de mayu.
 
La XDLA continúa coles xornaes de revisión del Llibru Blancu
 
El salón d'actos del Departamentu de Filoloxía Española de la Universidá d'Uviéu va acoyer güei, a partir de les 18 hores, la tercer xornada del ciclu de meses-taller ‘15 años del Llibru Blancu: revisión y actualización de la política llingüística’ qu'entama la Xunta pola Defensa de la Llingua Asturiana (XDLA). Nesta ocasión, va tratase’l tema de los servicios de normalización cola actividá entitulada 'Hacia la consolidación y espansión de los Servicios de Normalización Llingüística'. Nella van tomar parte Penélope Miranda, presidenta de l’Asociación de Trabayadores de la Normalización Llingüística; María Xosé Rodríguez, responsable de la Oficina de la Llingua de Xixón; Adolfo Camilo Díaz, xestor cultural; y Esteban Intriago, abogáu. Mentes, Mónica Riesgo, miembru de la Xunta pola Defensa de la L.lingua Asturiana y trabayadora del Serviciu de Normalización de Cangas, va moderar el debate.