El nuevu decanu de Filoloxía ve contradictorio que la so facultá tenga estudios reglaos d'asturianu y Maxisteriu non

Enrique del Teso, nuevu decanu de la Facultá de Filoloxía, considera contradictoriu'l fechu de que'l so centru vaya tener estudios reglaos d'asturianu (minor) na reforma de les enseñances superiores pa la so adautación al espaciu européu, y la Escuela de Maxisteriu, en cambiu, nun los tenga. Dende'l so puntu de vista, la Universidá "debe acoyer la formación de profesores d'asturianu pa tola enseñanza".

Del Teso respondió d'esta forma a entrugues d'Europa Press esta selmana, tres salir elixíu decanu nes elecciones acabantes de celebrase na Facultá de Filoloxía de la Universidá d'Uviéu.

Entrugáu por si nun-y paecía una descompensación que mientres Filoloxía aprueba'l minor de llingua, la direición de la Escuela de Maxisteriu nun acepte la creación d'una mención (especialidá) d'asturianu, el nuevu decanu respondió afirmativamente. "Los  políticos", señaló, "tienen que dar esplicaciones a la ciudadanía". "Si los poderes públicos deciden que l'asturianu ha ser una materia d'enseñanza, ¿cómo pue ser qu'esos mesmos poderes nun dean cursos pa la formación de los sos profesores?", añadió.

Del Teso se refería d'esta manera a l'ausencia d'unos estudios reglaos d'enseñanza en Maxisteriu que capaciten a los maestros d'enseñanza primaria a dar clase d'asturianu, han realizar un cursu de 'posgráu', llamáu 'Espertu en Llingua Asturiana', ofrecíu pola propia Facultáu de Filoloxía. Los llicenciaos en Filoloxía, pela so parte, candidatos a dar clase d'asturianu en secundaria, tamién han facer un 'posgráu', el de 'Especialista en Llingua Asturiana', pero a ésti va sustituyilu'l minor, incluyíu na enseñanza reglada.

Dase la circunstancia de que mientres en secundaria los alumnos d'asturianu ronden los 5.000 (menos de la cuarta parte del total), na enseñanza primaria son cerca de 22.000 (más de la metá del alumnáu).

Nesi puntu, Del Teso recordó que'l Departamentu de Filoloxía Asturiana de la Facultá unvió una propuesta a Maxisteriu en favor de la creación de la Mención d'asturianu, "que nin siquier hubo que votar porque s'aceptó por asentimientu".

MINOR INSUFICIENTE

Del Teso, videcanu nel anterior equipu xestor d'Ana Cano, ex decana y presidenta de l'Academia de la Llingua Asturiana, caltién la idea de que los estudios de 'minor' por formar el futuru profesoráu de 'llingua' en secundaria nun son "suficientes", pero descarta cualquier intentu, a mediu plazu, de modificación de la decisión de creación d'esta especialidá.

Recordó que la propuesta incial del so equipu yera la d'una especialidá de Llingua A d'asturianu de 72 creitos dientro del Maior de Llingües Modernes. Esta Llingua A diba sumar "dalgo más d'un cursu llectivu". El Minor tien 42 creitos, que ye "menos d'un añu". "Nunca pensamos qu'un Minor seya una especialidá", esplicó, "porque enxamás pensamos qu'una persona con un Minor d'inglés puea tar preparáu pa dar clase d'inglés, y poro nun lu consideramos suficiente". "Sólo ye trozu de carrera que nun te cualifica", añadió.

Al so xuiciu, sin embargu, "debemos avezamos a que les decisiones tengan un caltenimientu, polo qu'entrar nesti tema agora diba ser un mal pasu". "Hai qu'aceptar", añadió, "les situaciones en minoría", en referencia a la votación na que se perdió la propuesta incial d'una Llingua A d'asturianu.

"Nun sé", añadió, "si va acabar entrando l'asturianu en Filoloxía como titulación", un aspeutu que rellacionó coles decisiones que nel futuru tomen los políticos al respeuto, en referencia al alderique sobre la oficialidá, el cual reconoció, que diba afeutar especialmente a la facultá que dirixe.