La coalición Bloque-UNA amplíase con Los Verdes-Grupo Verde

‘Compromisu por Asturies’, la marca cola Bloque por Asturies-UNA va presentase a les eleiciones del 25-M, incorpora a Los Verdes-Grupo Verde. La organización ecoloxista y animalista yá formo parte de la coalición Unidá.
 
“Les trés formaciones llegaron al alcuerdu de sumar fuercies nesta convocatoria eleutoral ante'l convencimientu compartíu de la necesidá d'arrexuntar nuna mesma propuesta visiones asemeyaes de la realidá asturiana”, esplicaron nun comunicáu dende Bloque por Asturies-Unidá Nacionalista Asturiana (Bloque-UNA). D’esta forma, el nome de la coalición pa la cita coles urnes del 25-M ye ‘Bloque por Asturies-Unidá Nacionalista Asturiana-Los Verdes-Grupo Verde: Compromisu por Asturies’, siendo les sigles ‘Bloque por Asturies-UNA-LV-GV’.
 
Según espliquen dende Bloque-UNA, cola incorporación de LV-GV se refuerza’l “componente ecoloxista y animalista de la propuesta eleutoral, yá que la necesidá imperiosa de dar una respuesta contundente a la crisis y a les midíes de retayos de los gobiernos españoles y asturianos –defendíes d'una o otra manera por tolos partíos parlamentarios: PSOE, PP, IX y FAC–, tienen de ser totalmente compatibles col apueste decidíu pola defensa del nuesu medioambiente y cola meyora na construcción d'una sociedá sostenible”. Mentes, dende la organización ecoloxista y animalista señalaron nun comunicáu robláu por Rosanna Rodríguez, representante de Los Verdes-Grupo Verde Asturies, y dirixíu a la so militancia y simpatizantes, que “formamos un tríu de partíos realmente comprometíos con Asturies. Tamos equí con ilusión y dispuestos a escuchavos y llevar la vuesa voz, la de tolos asturianos y la de tolos animales, allá ónde pueda sentise”. Nel mesmu recuerden que’l Bloque por Asturies foi “l’únicu partíu que tuvo valentía de presentar una moción contra’l maltratu animal” y destaquen la implicación d’UNA pa col país.
 
LV-GV foi la novena fuercia más votada’l 22 de mayu pasáu, al sumar 3.626 votos (un 0,62 por cientu del total). Mentes, Bloque-UNA foi la sétima formación que rexistró más apoyos: 6.191 (1,06 por cientu).
 
Equo preséntase en solitariu
 
La otra candidatura ecoloxista nes eleiciones nacionales anticipaes de marzu va ser Equo, marca na que ta integrada Los Verdes d’Asturies, tres nun llegar a un alcuerdu con Izquierda Xunida pa repetir coalición, al igual qu’en mayu.