El conceyal xixonés Carlos Rubiera faló nel Plenu d’esti vienres d’un compló supuestu del PSOE contra él y el conseyeru de Cultura, Emilio Marcos Vallaure. Fixo referencia a un corréu electrónicu unviáu, por error, a la xerente del Xovellanos.

Na so intervención, el conceyal d’Educación, Cultura, Mocedá y Festexos defendió les midíes adoptaes en materia cultural y dexó nidio qu’en nome de la cultura nun se pue xustificar el despilfarru de dineru públicu. Rubiera achacó les crítiques hacia él al "agitprop" d’axitación y propaganda orquestáu, na so opinión, pol PSOE, y al mesmu tiempu faló d’un corréu electrónicu nel que s’esplica esi compló supuestu contra él y tamién contra Marcos Vallaure.

Según señaló, en payares, la xerente del Teatru Xovellanos, María Teresa Sánchez, recibió de manera accidental un corráu electrónicu firmáu pola secretaria del grupu de Cultura socialista nel que, ente otres coses, faese un resume d’una reunión anterior nel que s’aludía a un trabayu d’oposición "quiciabes demasiao prudente" y se pidía más contundencia. Tamién s’instaba a recordar el citáu 'agitprop' –estratexa política venceyada al comunismu– y s’establecíen, ente les llinies d’actuación, el facer un estudiu a fondu de los perfiles y declaraciones de Rubiera y de Vallaure, y se mantuviera’l contautu con organizaciones culturales, sobre manera coles "perxudicaes" pola actuación de los dos homes de FAC, como’l Nicanor Piñole, la Fundación Ana María Iriarte, la Semana Negra o el Festival Internacional de Cine de Xixón (FICXixón).

"Yá ve como pervive l’espíritu antiguu de la Xunión Soviética", dixo Rubiera al voceru de IX-LV, Jorge Espina, "agora qu’alloñó’l pantasma antiguu de Lenin", añadió al respeuto de la dimisión del coordinador llocal de la coalición, Jesús Montes Estrada 'Churruca'. La intervención del edil nel Plenu foi a pidimientu d’IX-LV.

Sobre la llegada de Nacho Carballo a la direición del FICXixón, l’edil aseguró que’l cineasta nun va cobrar más que José Luis Cienfuegos y apuntó que’l prestixu del festival nun se debe namái a la persona que programó les dieciséis ediciones últimes, del que afirmó nun tener "el más mínimu xuiciu negativu", anque dexó nidio que’l de direutor nun pue ser un cargu vitaliciu. D’igual forma, señaló que les movilizaciones que piden la so dimisión son pa distrayer y intentar convertir en verdugu a quien fixo lo que tenía que facer pa continuar col festival, pa depués añadir qu’a otros nun-yos importa esti eventu, sinón la "política de tierra quemada" y dir contra too cambiu que signifique aire nuevo cola intención única de "desgastar" a FAC.
 
Pidimientu de dimisión

Nel Plenu tamién participó Beatriz Menéndez, de la Plataforma por la Cultura, que se desvinculó políticamente y reivindicó de les instituciones la ufierta d’actividaes ensin basase en criterios económicos de manera esclusiva, "y muncho menos personalistes" pa xestionales. La vocera d’esti coleutivu llamentó que tean en riesgu’l FICXixón y la Semana Negra. Del primero, criticó la destitución del so direutor pese al clamor popular y los actos de protesta que, según ella, lleven al certame a un "fracasu probable y a una decadencia intolerable"; y sobre el segundu, reprochó "l’acosu y valtu" a esti eventu, focu d’atracción turística pese a ser polémicu y necesitar dalgún cambiu, na so opinión.

Por último, citó otres midíes, como la supresión del escenariu de la Plaza Mayor na Selmana Grande, la reducción de casi un 50 por cientu de les actividaes del Xovellanos o la incertidume sobre la continuidá de 'Arte na cai'.  "Güei voi dir más segura que nunca a pidir la so dimisión porque pienso que Xixón nun se merez un conceyal como vusté", concluyó en referencia a la concentración convocada a les puertes del consistoriu para les 21 hores de güei.