Soliciten a Cultura qu’investigue les decisiones de Patrimoniu sobre’l parque eólicu de Lombreiros

La Coordinadora Ecoloxista d’Asturies solicita a la Conseyería de Cultura y Deporte qu’investigue les decisiones de Patrimoniu con motivu de la construcción del parque eólicu de Lombreiros. Ésti afeuta al castru d'El Chao Samartín.
 
Según espliquen los ecoloxistes, l’alcuerdu últimu de la Comisión de Patrimoniu sobre este parque eólicu de Grandas de Salime, con fecha del 28 d’abril del 2011, modifica de manera sustancial los anteriores de les sesiones del 28 de xineru del 2010 y del 15 d’abril del 2011. Ésti “tómase inorando’l procedimientu de la Conseyería de Cultura d’aniciar espediente de Bien d’Interés Cultural al castro d'El Chao Samartín, too ello ensin motivación dalguna que contradiga los informes anteriores del Serviciu de Proteición y Réxime Xurídicu del 14/01/2010”.
 
“En nengún de los alcuerdos vemos que se tuviera en cuenta’l cambiu sustancial del proyeutu d’aumentu n’altor de 45 metros total, al pasar d’unos aeroxeneradores de 110 d’altura de buxe y 112 de rotor que dan un altor de pala de 166 metros”, continúa’l comunicáu. Los propuestos pola empresa na fase de suxerencies del 2009 yeren de 78 metros d’altor y 80 de rotor, que dan un total d’altor de pala de 118 metros. “Entendemos qu’esti parque afeuta visualmente de forma notable al Chao Samartín, que ye un Bien de Interés Cultural (BIC), polo qu’entendemos que dende Patrimoniu se tendría que prohibir de forma espresa’l so desarrollu al ser imposible amenorgar l’impauto visual de 7 aeroxeneradores de 168 metros d’altor que constituiría un telón de fondu inmediatu y difícilmente resalvable”, aseguren los ecoloxistes.
 
Por toos estos motivo, reclamen la modificación del alcuerdu del 28 d’abril pasáu y que s’investiguen les razones poles que “nun tuvieron en cuenta los informes internos que desaconseyaben l’aprobación d’esti proyeutu”.
 
Na semaya, una simulación de los aeroxeneradores tres el castru d'El Chao Samartin fecha pola Coordinadora Ecoloxista d'Asturies.