L’Sporting garra fuelgu

Dos auténticos golazos dieron el trunfu a los asturianos na so visita a Pamplona. D’esti mou l’Sporting garra fuelgu depués de cuatro derrotes siguíes y gana amás a un rival directu na llucha pola permanencia. Esta vez volvió l’equipu ofensivu y esforzáu, y gracies a ello algamaron los tres puntos qu’asitien a los xixoneses nel puestu decimuterceru con trenta puntos.

Por fin llegó un trunfu tres la mala impresión del equipu nos últimos partíos. Y ye que’l partíu contra l’Osasuna yeren más que los tres puntos, xugábase ún d’esos partíos que pueden ser claves na llucha pola permanencia, por cuenta que l’equipu navarru taba namás a tres puntos de los asturianos.

L’Sporting salió como ye davezu dexando’l balón a los osasunistes, y esperando sorprendelos al contraataque. Y asina llegó’l primer gol. Un mui bon centru de Carmelo sirvió pa que Barral rematase según-y llegaba’l balón, batiendo a Roberto con un trayazu imparable. Sicasí, nun se cumplieren los vente minutos de xuegu y los asturianos volvien a marcar gracies a una xugada individual de Diego Castro, ún de los xugadores claves del partíu y qu’amás marcó’l gol de la xornada, al garrar el balón na banda izquierda, dirixise a la esquina de la frontal del área y tirar dende hai un xut  fortísimu qu’acabaría entrando pela escuadra de la portería del Osasuna. Con 0-2 paecía que los visitantes yá teníen los tres puntos na mano, pero un penalti bastante discutible por unes manes de Barral na barrera nun llanzamientu de falta propició’l gol local al cumplise la media hora de xuegu.

Na segunda parte l’Sporting controló mas el balón y tuvo les meyores ocasiones gracies a un disparu de Luis Morán nel área que detuvo nuna gran intervención Roberto, y a un gol mal anuláu a Barral por supuesta falta ofensiva. L’Osasuna intentó echase p’alantre buscando l’empate pero tuvo mui poca pegada nos metros finales, nun llevando peligru real a la portería asturiana.

Con esta victoria l’Sporting asitia a cinco puntos del descensu y vuelve a tener una selmana tranquila a la espera de la visita del Deportivu de La Coruña’l próximu domingu.

Ficha técnica

Osasuna 1- Sporting de Xixón 2

Osasuna: Roberto; Javier Flaño (Dady, m.59), Cruchaga (Hidalgo, m.71), Miguel Flaño, Monreal; Juanfran, Puñal, Nekounam, Plasil; Masoud (Delporte, m.59) y Pandiani.

Sporting: Lafuente; Sastre, Iván Hernández, Neru, José Ángel; Matabuena, Míchel; Luis Morán (Camacho, m.69), Carmelo (Bilic, m.84), Diego Castro (Kike Mateo, m.77); y Barral.

Goles: 0-1, m.8: Barral. 0-2, m.19: Diego Castro. 1-2, m.28: Nekounam, de penalti.

Árbitru: Luis Medina Cantalejo (Andaluz). Sacó tarxetes amarilles a Puñal (m.45) y a Monreal (m.67) del Osasuna, y a Carmelo (m.17), Barral (m.29), Sastre (m.30), Matabuena (m.31) y Iván Hernández (m.58) del Sporting.