El Partíu Asturianista (PAS) nun va participar nes eleiciones del 25 de marzu. Sicasí, el so compañeru de viaxe nes cites últimes coles urnes, la URAS, sí tien previsto presentar candidatura a la presidencia del país.

Xuan Xosé Sánchez Vicente confirmó a Asturies.com esta decisión, tomada’l miércoles polos dirixentes del partíu tres delles conversaciones. “Nun nos vamos presentar porque, dao la situación, nun queremos poner a los nuesos simpatizantes na tesitura d’algamar un mal resultáu”, esplicó’l presidente del PAS, qu’ayeri recibió una llamada de la Unión Renovadora Asturiana (URAS) pa conocer les intenciones de los asturianistes. Pese a la negativa del PAS a tomar partes nestes eleiciones, los rexonalistes sí que tienen previsto participar na cita coles urnes del 25 de marzu. Dambes formaciones presentaron candidatura conxunta nel 2007 y en mayu pasáu, sufriendo un descensu de votos considerable al pasar de 13.314 (2,27 por cientu) a 2.948 (0,49 por cientu).

Sobre les postures que tán manteniendo FAC y PP, que lleva al país a esta convocatoria d’eleiciones, l’escritor xixonés señaló que yera dalgo “inevitable” dende’l momentu en que decidieron “partir el negociu en dos pa dividir la clientela”. D’igual forma, Sánchez Vicente, que pronostica unos resultaos asemeyaos a los del 22 de mayu pal 25-M, llanzó un mensaxe a los partíos parllamentarios al recordar que, nuna situación similar, “el PAS llegó a un alcuerdu con Marqués que permitió crear 20.000 emplegos en 4 años y sacar alantre la Llei d’Usu. Hai conductes coles que se pueden llegar a alcuerdos en situaciones mui complicaes”.