El Conseyu del Teatru Xovellanos noma a Carballo direutor del FICXixón colos votos en contra del PP

Nacho Carballo yá ye, de manera oficial, direutor del FICXixón en sustitución de José Luis Cienfuegos. El Conseyu d’Alministración del Teatru Xovellanos aprobó’l so nomamientu colos votos en contra de los representantes del PP.

Na xunta celebrada güei acudieron tolos miembros del Conseyu: los conceyales de FAC, José Carlos Rubiera (presidente), Carmen Alsina y Pedro Javier Barbillo; Jesús Martínez; Enrique Remis; Inmaculada Gallart (PP); Francisco José Rodríguez Cubiella (PP); Raquel Vega (PP); y Andrés Avelino García Prieto. Tamién participaron nel alcuentru la xerente del Jovellanos, María Teresa Sánchez, y la secretaria y l'interventor municipal del Conceyu de Xixón, Dora Alonso y Juan Salas, de manera respeutiva.

El nomamientu salió alantre pese a les quexes previes del PP, que llegara a solicitar que se retirara’l puntu únicu del orde del día –la propuesta de contratación del direutor nuevu– poles duldes que teníen los populares sobre la rescisión del contratu de Cienfuegos por nun pasar enantes pel Conseyu. Tanto la xerente como Rubiera defendieron la potestá d'ambos pa decidir sobre los nomamientos y cambios al frente del certame y añadieron que s'informaba al Conseyu por deferencia. Carballo, según la mesma xerente, va tener un contratu d'alta dirección y va cobrar por él la mesma cantidá que Cienfuegos.