El direutor de Mediu Ambiente dimite tres ser llamáu a declarar pol casu de corrupción n’Alministración

Francisco Rivas dimitió esti martes del so cargu como direutor de Mediu Ambiente tres conocer que ta siendo investigáu pol xuez Ángel Sorando. Supuestamente solicitó ayuda a un funcionariu pa da-y trabayu al fíu d’un amigu.
 
Tres la incoación de les dilixencies previes, el maxistráu que lleva’l‘ casu Marea’ treslladó a la Policía'l conteníu de dilixencies pa qu'investigara quién pudiera tar rellacionáu colo narrao nuna denuncia anónima recibida pola encargada anterior del casu cuando ésti taba en Xixón, según informó'l Tribunal Superior de Xusticia d'Asturies. Esta investigación entiende que Rivas yera, polo menos, una de les persones a les que policialmente podría imputáse-yos la comisión de dalgún de los delitos atribuyíos na denuncia.
 
Ante tal circunstancia, el Xulgáu comunicó a Rivas que tendría que presentase a primeros del mes de marzu cola so representación llegal pa emprestar declaración en sede xudicial, pola imputación policial de dichu delitu. Tres esa declaración, el maxistráu va decidir la imputación xudicial o non del declarante. Sicasí'l conseyu de Gobiernu que se va celebrar esta selmana tien previstu formalizar el so cese aceptando la so dimisión.
 
Per un corréu electrónicu
 
La investigación, según publica güei’l diariu asturianu 'El Comercio', surde depués de que los axentes del Cuerpu Nacional de Policía identificaren a Francisco Rivas como propietariu d'una cuenta de corréu electrónicu dende la qu'unvió en payares del 2007 un mensaxe que llevantó los sos barruntos. Nel documentu, Rivas solicita ayuda a un amigu suyu, funcionariu de l'Alministración, pa llogra-y trabayu al fíu d'un terceru. "Unvíote'l currículu del fíu de Javier de Somiedo –nome ficticiu– pa ver si podemos da-y un emburrión neses oposiciones que convocó la Conseyería d'Economía", empieza'l testu.
 
El remitente precisa que la idea ye ayudar al tal Javier pa esa plaza, pero que tamién-y valdría "cualquier trabayu interín qu'él pudiera exercer... Vamos, que ta abiertu a cualquier ufierta de trabayu. Ta empezando, yá sabes". El decanu de la prensa nacional  destaca tamién que, nel corréu, Rivas añade al so contautu n’Alministración asturiana que la xestión "non sólo l'agradecería personalmente. Tengo muncho interés nél; me cueste lo que me cueste”.