L’Arribada homenaxea a Luis Argüelles Sánchez pol so llabor a favor de la cultura asturiana

L’ex responsable del Muséu del Pueblu d’Asturies y el Muséu de la Gaita, Luis Argüelles Sánchez, va recibir un homenaxe esti martes. L’Arribada entama esti actu col que pretende reconocer el llabor que fixo Argüelles pola cultura asturiana.

L’actu va tener llugar a les 16.30 hores nel Centro Gerontológico Jovellanos (Muros de Galicia 3, Xixón) y nella van tar presentes Carlos Rubiera, conceyal d’Educación, Cultural, Mocedá y Festexos; y Xosé Nel Riesgo, direutor de la Fundación Municipal de Cultura, Educación y Universidá Popular. Ésti va consistir na entrega a Argüelles d’una placa conmemorativa y nel nomamientu del ex responsable del Muséu del Pueblu d’Asturies como miembru honoríficu de l’Asociación Cultural L’Arribada. Enantes, l’académicu Xuan Xosé Sánchez Vicente va facer una presentación sobre la trayeutoria d’Argüelles.

Con esti eventu, nel que va actuar el músicu tradicional Daniel García de la Cuesta, el coleutivu pretende homenaxear y reconocer “a Don Luis Argüelles Sánchez pol llabor fechu al rodiu del estudiu, recuperación y espardimientu de la cultura asturiana a lo llargo la so vida y como responsable durante varios años del Muséu del Pueblu d’Asturies y Muséu de la Gaita”, según espresa nuna nota. L’actu d’homenaxe a Argüelles ta abiertu a tol públicu.