El xueves termina’l plazu pa matriculase pa la prueba de conocencia de l’ALLA

Esti sábadu va tener llugar la prueba de conocencia de l’Academia de la Llingua Asturiana (ALLA). Los interesaos en facela tienen hasta esti xueves pa formalizar la so matrícula na sede de la institución académica.

Esta convocatoria ye una de les dos oportunidaes qu’ufre l’ALLA tolos años –la segunda tien llugar en mayu– p’algamar esti títulu que certifica la conocencia de la llingua del país “y manifestar asina’l so fondu amor al idioma asturianu”. L’esamen, que va celebrase’l sábadu a partir de les 9.30 hores na Facultá de Formación del Profesoráu y Educación (antigua Facultá de Ciencias de la Educación), nel campus de Llamaquique, ta dividíu en dos partes: una estaya llingüística y otra de llingua y sociedá.

La primer d’elles principia con una prueba de teoría gramatical, pa llueu dar pasu a una práutica escrita y otra oral, mentes que la segunda evalúa’l conocimientu del allugamientu del asturianu dientro de la sociedá asturiana y del procesu de normalización llingüística. La xente interesao en facer l’esame pueden solicitar información sobre la prueba de conocencia nel teléfonu 985 211 837. La hora pa formalizar la matrícula na sede de l’ALLA ye de 9 a 15 hores y de 16 a 19 hores.