El Muséu de Belles Artes dedica a Xovellanos el calendariu del 2012

Trece semeyes d’obres de la esposición ‘Xovellanos y el so entornu nes coleiciones del Muséu de Belles Artes d’Asturies’ conformen el calendariu del 2012 de la pinacoteca. Ésti ta editáu n’asturianu, gallego-asturiano y castellanu.

El conseyeru de Cultura y Deporte, y direutor tovía del muséu, Emilio Marcos Vallaure, presentó güei’l calendariu, que recueye "la seleición de lo meyor, de lo más significativo d'esta esposición cola que se remataron los actos de bicentenariu" del ilustráu xixonés. Asina, empieza col retratu de Xovellanos, pintáu por Goya, en xineru d'esti añu, y acaba, en xineru del 2013, cola obra 'Libros y muñecos', de Nicanor Piñole. Semeyes del Padre Feijoo (Salvador Maella), de Carlos IV (Francisco Goya) o d'Álvaro Flórez-Estrada tamién figuren na escoyeta.

Esti añu’l calendariu torna a facese nes tres llingües del país: “Asturies tien un patrimoniu llingüísticu riquísimu. Amás del castellán, falamos l'asturianu y el gallego-asturianu na zona occidental, y el muséu fai los calendarios nes trés llingües", esplicó a los periodistes presentes. Entrugáu por si esti patrimoniu llingüísticu salió mal paráu tres la rebaxa del presupuestu de Política Llingüística, Vallaure respondió que "salió mal parao too". "Hai un necesariu d'axuste, qu'esperemos que sía l'únicu, porque la situación financiera ye mui grave", añadió.

Asina, dende'l puntu de vista del conseyeru, "en tiempos de crisis, hai qu'aprender a apretar el cinturón". Recuerda que "l'añu pasáu, el muséu nun tuvo presupuestu, esti añu tien 1.052.000 euros, y nel 2004, teníamos trés millones y mediu. Lo qu'hai que facer ye reducir les esposiciones al máximo y faceles con fondos propios", exemplificó.