Llaviana, Corvera y Ozcos-Eo, queden ensin serviciu de normalización llingüística

Como yá ye vezu cuando principia l’añu, dellos servicios de normalización llingüística quedaron paralizaos pola pasividá de los conceyos. Nesta ocasión son trés los SNL afeutaos –Llaviana, Corvera y Ozcos-Eo–, a los qu’hai que sumar Mieres.

“Aparte de la dificultá de la situación pa la normalización llingüística y del agraviu comparativu qu’esto supón pa colos usuarios d’estos servicios de normalización y pal personal llaboral que venía faciendo’l so trabayu nellos, nun entendemos por qué unos conceyos tienen el so SNL abiertu tol añu mientres Llaviana, Corvera y Ozcos-Eo, esti añu, y Mieres o la Mancomunidá del Sueve, n’exercicios pasaos, cadecen la desconsideración, dexadez y falta de compromisu de los responsables de los conceyos, que nun se quieren facer cargu d’estos servicios y los sos trabayadores mientres nun tengan les perres que los financien na mano”, denuncien dende l’Asociación de Trabayadores de la Normalización Llingüística. Nesi sen, recuerden que Mieres lleva ensin serviciu dende’l mes d’agostu.

Esta situación, que se repite añu tres añu, tien nesta ocasión el problema amestáu de la necesidá de xustificar enantes del 31 d’esti mes ante la Direición Xeneral de Política Llingüística les campañes desarrollaes nestos meses pasaos. “¿Cómo se va facer esti llabor si nun hai personal nin actividá nestos servicios?”, entrúguense los trabayadores. “D’esta miente ta parándose, con una falta clara de compromisu, el trabayu pola normalización y dignificación del asturianu y del gallego-asturianu, situación a la que ha pone-y fin l’aición decidida de la Direición Xeneral de Política Llingüística, acullá de continxencies polítiques o presupuestaries del momentu nel que tamos”, reclamen al mesmo tiempo que denuncien que “el métodu pol que se financien estos servicios nun ye l’afayadizu y nengún añu garantizó la continuidá de tolos SNL. Esto ye una situación demostrable; basta con echar un güeyu pa lo que vien pasando munches veces nos conceyos o mancomunidaes que tienen estos servicios”.

Pa finar, dende esti coleutivu demanden “la reapertura del Serviciu de Normalización de Mieres y de Corvera, de la Oficina de Normalización Llingüística de Llaviana y del Oficina Cultural y Lingüística da Mancomunidá Ozcos-Eo nunes condiciones dignes que garanticen la so estabilidá y continuidá del llabor que se vien faciendo y del personal que trabaya nellos col oxetivu de que la normalización social del asturianu y del gallego-asturianu sía un procesu activu y estable”.