Marcos Vallaure utiliza l’asturianu y el gallego-asturiano na so intervención na Comisión de Cultura

Emilio Marcos Vallaure fixo una parte pequeña del so discursu na Comisión de Cultura n’asturianu y en gallego-asturiano. El conseyeru señaló, a entrugues d’IX-LV, que l’ALLA “tendrá qu’adecuar les sos actividaes a los sos recursos”.

Na so intervención, l’ex direutor del Muséu de Belles Artes esgranó la llei de presupuestos no que se refier al so área, con una partida de 2,1 millones pa política llingüística, lo que supón una mengua del 24 por cientu en comparanza col añu anterior. Mentes,  l’Academia de la Llingua Asturiana (ALLA) ve cómo se reduz el 27 por cientu la so asignación económica pa quedar en 167.900 euros –cantidá asemeyada a la que manexaba la institución académica nel 1997–, lo que va impidir el cumplimientu de dalgunos oxetivos marcaos pa esti añu pola ALLA, como la espublización de tolos trabayos premiaos nos sos concursos, según anunció la presidenta, Ana María Cano, a Asturies.com la selmana pasada.

El direutor xeneral de Política Llingüística, Alfredo Ignacio Álvarez Menéndez, a entrugues d’Izquierda Xunida-Los Verdes d’Asturies,  afirmó que nun-yos presta tener que recortar recursos, pero que nun hai más remediu nesti contestu de crisis. "Tendrán qu’adecuar les sos actividaes a los sos recursos. La realidá económica ye la que ye", añadió Marcos Vallaure, qu’aseguró que n’otru contestu nun tendría nengún inconveniente en dar más recursos a l’ALLA, "pero toles instituciones asturianes tienen que sufrir reducciones".

Una “burbuya cultural” qu’acabó “esplotando”

Nel so discursu, Marcos Vallaure, qu’utilizó en parte l’asturianu y gallego-asturianu, calificó los presupuestos de Cultura y Deporte de "realistes” pa unos tiempos "mui difíciles" y responsabilizó al Executivu anterior de propiciar qu’Asturias viviese nuna "burbuya cultural" qu’acabó "esplotando como la del lladriyu”. "Nun podemos permitinos nin un solo xestu de frivolidá", manifestó, pa depués esplicar qu’Asturies vivió nos años últimos "perriba de les sos posibilidaes" en materia cultural, con un Gobiernu que ponía en marcha un "espectáculu de fueos d’artificio y cantos de serena". Asina, indicó que nos años d'Executivu socialista construyéronse dellos complexos culturales, centros d’interpretación y museos qu’anguaño "muerren" y "debilítense" por falta de recursos y personal.

Frente a esi modelu de xestión, Marcos Vallaure dixo que’l so equipu quier reintroducir pallabres como "planificación", "organización" y "reflexón". Trátense d’ unes cuentes, al so xuiciu, que "nun dexen a naide de llau" a pesar de la reducción necesaria respeuto al añu pasáu como consecuencia de la crisis. Amás, garantizó que’l so departamentu velará por que la llibre participación, el méritu y la capacidá sían los requisitos únicos pa incorporar personal direutivu pa equipamientos como’l Muséu de Belles Artes.

El conseyeru esplicó que’l presupuestu en Cultura y Deporte pal 2012 ye de 58.078.639 euros, lo que supón un descensu del 28,15 por cientu respeuto a les cuentes del 2011. Según esplicó Marcos Vallaure, la diferencia col añu pasáu, de 22,7 millones, obedez en gran midida a la conclusión d’obres de grandes equipamientos culturales como el Centru Cultural Internacional Avilés, el Centru d’Arte Rupestre de Tito Bustillo, el Centru Cultural Valey de Castrillón, el polideportivu de Cuideiru y la meyora de les instalaciones de Valgrande-Payares. D’esta forma, dende’l Gobiernu consideren que la diferencia "real" col presupuestu del 2011 ye de 4,4 millones, un 7,04 por cientu menos.