El Gobiernu va defender el principiu de solidaridá ente territorios nel Conseyu de Política Fiscal

Ramón del Riego, conseyeru de Facienda, anunció que va reclamar el cumplimientu de del principiu constitucional de solidaridá ente territorios nel Conseyu de Política Fiscal y Financiera. Ésti va celebrase na tarde del martes en Madrid.

El Gobiernu recuerda que'l mes d'agostu pasáu'l Congresu de los Diputaos cambió la Constitución pa reconocer el Principiu d'Estabilidá Presupuestaria, dando una redaición nueva al artículu 135 de la Carta Magna. La concreición d'esti principiu, asina como los medios p'asegurar la so realización efeutiva, quedaron diferíos a la posterior aprobación d'una Llei Orgánica. El compromisu del Executivu cola estabilidá presupuestaria, según señaló Del Riego nun comunicáu, ye claru y manifiestu al adoptar, dende la so toma de posesión el pasáu 18 de xunetu, múltiples decisiones que son manifestación de la so decidida voluntá d'asegurar l'equilibriu de les finances nacionales.

El conseyeru tamién anunció que nun s'opondrá al establecimientu de mecanismos de control adicionales a los yá esistentes pal control del déficit públicu, siempre que resulten respetuosos col marcu constitucional y estatutariu vixente. Nesti asuntu, según el Gobiernu, ye inevitable tomar midíes pa evitar la reedición de los importantes déficits provocaos polos gobiernos autonómicos de la llexislatura anterior que, lloñe de prauticar l'austeridá y la seleición de los gastos, dedicóse a gastar ensin control.

Nesi sen, Asturies va proponer al restu de comunidaes delles midíes de control como la remisión al Ministeriu de Facienda y Alministraciones Públiques d'estaos mensuales d'execución presupuestaria; la creación de comisiones billaterales col Estáu pal siguimientu y cumplimientu de los oxetivos de déficit, asina como d'un sistema d'ayuda estatal que permita a ésta y otres comunidaes acceder en condiciones más favorables al creitu; sistemes de sanción pal casu d'incumplimientu de los oxetivos por esvíu nos gastos; y responsabilidaes polítiques y personales p'aquellos xestores públicos qu'incumplan de manera continua los oxetivos marcaos y los encamientos pa la reconducción de los esvíos.

Por ello, el Gobiernu alvierte al Executivu estatal que l'adopción d'alcuerdos contrarios a los principios de cohesión y solidaridá son tamién contrarios a la Constitución y a derechu comunitariu, como ye'l casu del Alcuerdu del Conseyu de Ministros del pasáu 30 d'avientu pol que "s'eliminen" los fondos mineros, lo que, pa Foro Asturias Ciudadano (FAC), constitúi una decisión inasumible p'Asturies por ser contraria a la solidaridá y a la distribución equitativa de la renta autonómica nel Estáu. Del Riego ye partidariu d'un sistema de financiación nuevu de les comunidaes autónomes, que garantice los principios de suficiencia y solidaridá ente territorios al aprobase l'actual sistema de financiación ensin contar col apoyu de la mayoría de los territorios afeutaos.