L’estrenu de ‘Eu soi quen fun’ enllenó de públicu’l salón d’actos del Centru de Cultura Antiguu Institutu

Esti sábadu tuvo llugar l’estrenu del documental en gallego-asturiano ‘Eu soi quen fun’, de Melania Fraga, un viaxe pel occidente del país al traviés de la poesía d’Ana Vega. Unes 150 persones abarrotaron la sala de proyeición.

Xosé Miguel Suárez, asesor llingüísticu del documental y ún de les persones que conversen con Vega na cinta, encargóse de presentar l’actu utilizando l’idioma del occidente del país, al igual que tolos intervinientes a esceición del direutor xeneral de Política Llingüística, Alfredo Ignacio Álvarez Menéndez, qu’usó’l so asturianu. La primer en tomar la pallabra foi una “emocionada” Ana Vega, escritora sobre la que xira esta pieza audiovisual, qu’agradeció la oportunidá que supunxo pa ella esti trabayu “pa reencontrase cola tierra y la fala de los mios güelos, la mio xente y la mio tierra”.

Pela so parte, l’autora de ‘Eu soi quen fun’, aprovechó la so intervención p’agradecer l’apoyu de les instituciones y de les persones que financiaron el proyeutu al traviés de la plataforma ‘lanzanos.com’, una forma nueva d’apoyar la creación que ta teniendo ésitu na rede. Tres Fraga, garró’l micrófonu Cecilia Pérez, alcaldesa d’El Franco, conceyu que tamién aportó perres pal documental, que destacó la “sensibilidá y tenrura” de Vega nesti documental que definió como “un reflexu del occidente vistu dende’l corazón”. P’acabar, Pérez fixo una defensa firme del mundu rural.

L’últimu en tomar la pallabra foi Álvarez Menéndez, qu’eloxó la cinta de Fraga –“un viaxe sentimental hacia’l pasáu a partir de los sentimientos” – poniéndola d’exemplu de “cómo trabayar dende les tradiciones y proyeutales hacia’l futuru”. Tamién aprovechó la so intervención pa defender la necesidá d’acabar “con esa visión de la cultura que ye rupturista coles tradiciones”. “Nun pue haber progresu si nun ye a partir de les raíces identitaries”, finalizó.

Tercer creación audiovisual na fala

Tres les intervenciones, diose pasu a la proyeición del documental, tercer pieza audiovisual creada en gallego-asturianu tres ‘A bruxa de Brañavara’ y ‘Os Reises del Valledor’. Nél, l’autora avera l’occidente asturianu al espectador al traviés de la vida y poesía de Vega, que se para a falar con Miguel Galano, Suárez, Ramiro Pérez y los integrantes del grupu Cádaba.

Pa zarrar l’estrenu, Lafu y Rebeca, responsables de la banda sonora de ‘Eu soi quen fun’, interpretaron en direutu dos cantares, ente ellos el compuestu pal documental.

Na semeya, Ana Vega fala al públicu presente nel estrenu ante la mirada de Xosé Miguel Suárez y Melania Fraga.