‘Manzajú’, de Ruma Barbero, llibru más vendíu del catálogu de Suburbia Ediciones nel 2011

Suburbia Ediciones, una de les editoriales del país con mayor actividá, dio a conocer nel so blogue’l llistáu de los diez llibros del so catálogu más vendíos nel añu 2011. El primeru ye’l cómic ‘Manzajú’, de Ruma Barbero.
 
Esta obra asoleyada nel 2010, Premiu Alfonso Iglesias de Cómic del 2009, encabeza una llista na que tamién sobresalen los poemarios ‘El sistema débeme una chocolatina’, de Pablo X. Suárez, y ‘Pallabres sin dicir’, obra debú de Cristina Menéndez Martín. El restu de llibros que componen el top 10 de Suburbia Ediciones son, nesti orde, ‘Añada pa un güeyu muertu’ (Adolfo Camilo Díaz), ‘Intentu d’escritura’ (Xurde Fernández), ‘La mio voz’ (Marta Mori), ‘Contadores de lluz’(dellos autores), ‘L’árbol de la verdá’ (Xurde Fernández y Marián García), ‘Despidida’ (Pablo Antón Marín Estrada) y ‘De les coses del mundu I’ (Ignaciu Llope).
 
El cómic de Barbero repite podiu nel acumuláu de ventes de Suburbia Ediciones a lo llargo de la so vida al ocupar el segundu puestu de la llista tres ‘Asturies cuenta… (Y naide nun escucha)’, obra que recueye rellatos de quince autores asturianos. Tres estes dos espublizaciones tán ‘Les sietes novies del rei’ (Xulio Arbesú), ‘Entierros de xente famoso’ (Xandru Fernández), ‘El combate melancólicu’ (Ignaciu Llope), ‘La espera’ (Xurde Fernández), ‘Mio ma, la pirata’ (Iris Díaz Trancho), Perreríes (Pablo Rodríguez Medina), ‘Vía de serviciu’ (dellos autores) y ‘Yoni y yo’ (Pablo X. Suárez).