Llamazares entruga nel Congresu pola discriminación d'Asturies nel preciu de los vuelos

|

El diputáu por IU nel Congresu, Gaspar Llamazares, plantegó a la mesa del Congresu de los Diputaos una serie d'entrugues en rellación a la "discriminación" a la que se ven sometíos los asturianos ante los elevaos costes de los vuelos ente Asturies y Madrid, puestos en serviciu sólo por Iberia.

Llamazares entruga al Ministeriu de Fomentu si tienen constancia de que la tarifa del billete del vuelu Asturies-Madrid ye nesti momentu la más cara de toles comunidaes del cordal cantábricu, dende que n'ochobre del 2008 se suprimieren les conexones dende Asturies cola capital del Estáu de les llamaes compañíes de baxu coste.
Amás, el diputáu d'IU entruga si'l Ministeriu tien previsto poner en marcha dalguna iniciativa cola compañía Iberia que permita abaratar el coste de dichu billete y si se va a desarrollar dalguna midida que garantice una mínima competencia na conexón aérea Asturies-Madrid.
Gaspar Llamazares asegura na formulación de les sos entrugues que volar dende'l Principáu a Madrid cuesta tres veces más que facelo dende A Coruña, seis veces más que si sal dende Santander y siete veces más que si se fai dende Santiago de Compostela.
Amás, asegura que la discriminación a la que se somete a los asturianos ye triple, dao que la salida per carretera ta gravada por peaxe y amás nun disponen de conexón ferroviaria d'alta velocidá.
 

Contador Estadistiques