Consuelo Vega inaugura l'stand d'Asturies n'Expolingua

|

El Gobiernu del Principáu inauguró ayeri'l so 'stand' dedicáu a la llingua asturiana, na feria  Expolingua Portugal, que se celebra  hasta'l próximu xueves en Lisboa, acompañada por una representación de l'Academia de la Llingua y del Gremiu d'Editores.

La directora xeneral de Política Llingüística, Consuelo Vega Díaz inauguró'l 'stand', en compañía de Roberto González Quevedo, secretariu de l'Academia de la Lingua Asturiana, y Marta Magadán Díaz, presidenta del Gremiu d'Editores d'Asturies. L'actu contó tamién cola presencia de los conseyeros d'Educación y Cultura de la Embaxada d'España en Portugal y con una representación del Institutu Cervantes de la capital portuguesa ente otres autoridaes y públicu.

L'espaciu, de 18 metros cuadraos, muestra títulos de 40 autores asturianos, amás d'información turística y etnográfica d'Asturies y la presencia de polo menos diez editoriales asturianes. Amás ofrez a los visitantes información en dellos idiomes sobre la llingua asturiana, la so historia y situación y espón una muestra de publicaciones, diccionarios, gramátiques y normativa. amás de les últimes novedaes editoriales, la Conseyería tamién va parovechar el so 'stand, na feria pa dar a conocer les posibildiaes y los atractivos culturales y turísticos del Principáu.
Pa Consuelo Vega 'Expolingua' ye un marcu pa dar a conocer Asturies como una comunidá atractiva y de gran riqueza arquitectónica paisaxística, cultural". "Ye una oportunidá, n'opinión del Gobiernu, p'abrir  un cauce de rellaciones non sólo culturales sinón tamién comerciales con Portugal", añadió.
 Nesti sen, Marta Magadán recalcó qu'existen editoriales asturianes con delegaciones y distribución en Portugal y que la presencia del Gremiu n'Expolingua pue ayudar a abrir un mercáu potencial nel país vecín pa los autores asturianos.
ANTOLOXÍA
Aprovechando la celebración de la feria, va presentase nel Institutu Cervantes de Lisboa "una antoloxía poética billingüe, coeditada pol Gobiernu del Principáu y la editorial Trea y coordinada pol escritor Xuan Bello". El llibru, 'Una mirada diversa-Una olhada diversa', inclúi una muestra de poemes, en portugués y tornáu al asturianu, de dellos autores del país lusu. Dos d'ellos, Valter Hugo Mae y Nuno Judice, van tar nel actu.

Contador Estadistiques