Bloque-UNA de Xixón critica l’ausencia de participación ciudadana na ellaboración del presupuestu

La falta de participación ciudadana ye la carauterística principal del presupuestu municipal pal Bloque-UNA de Xixón. Esta forma d’actuar, n'opinión de la coalición, supón un “déficit democráticu de primer orde".
 
“Tanto los presupuestos anteriores de PSOE-IU, como agora los de Foro-PP, refugaron sistemáticamente una ellaboración democrática y participativa de los mesmos”, critica Daniel Fernández voceru de Bloque por Asturies-Unidá Nacionalista Asturiana (UNA) de Xixón. “Más allá de les crítiques al calter restrictivu del presupuestu; al amenorgamientu de la inversión pa reducir una delda totalmente asumible poles cuentes municipales; l'apueste por una austeridá mal entendida, que va suponer un retayu n'actividá económica de la ciudá; y la cesión de Foro a un amenorgamientu del presupuestu al Festival Atlánticu como si fuere la única partida reducible en cultura namás porque potencia la cultura asturiana, lo que supon un pecáu tanto pal PSOE como'l PP”, dende Bloque-UNA quieren destacar “l'ausencia absoluta de la mínima participación ciudadana na ellaboración del presupuestu y, polo tanto, que se realizara d'espaldes a los y les xixoneses”.
 
D’igual forma, Fernández llamenta que, otra vuelta, “vimos un tira y afloxa ente les fuerces polítiques con representación municipal qu'a la fin se soluciona con un alcuerdu qu'afecta a 100.000 euros frente a la propuesta orixinal del equipu de gobiernu, ensin que nenguna d'elles esixera que se realizara nengún procedimientu que fixera posible, anque fuera a nivel informativu, la participación de les vecines y vecinos de Xixón”. Pa los nacionalistes, esta situación supón “un déficit democráticu de primer orde”, yá que consideren que “tanto'l tándem Foro-PP como PSOE-IU siguen entendiendo la democracia como votar cada cuatro años, y eso ye a cencielles ponese en contra de la sociedá que ta reclamando tolos díes una mayor participación nes decisiones de los asuntos públicos”.
 
Bloque-UNA opina qu’un compromisu pola democracia esixe “abrir los asuntos municipales a la ciudadanía polo xeneral, y especialmente la introducción de la metodoloxía de los presupuestos participativos, cuidao que se traten del principal preséu d'orientación de les polítiques”. D’igual forma, recordó que la coalición llevaba nel so programa eleutoral la incorporación de Xixón a la Rede Estatal polos Presupuestos Participativos y l’aplicación de la so metodoloxía nel Conceyu como “elementu fundamental del nuesu compromisu cola democracia y la participación ciudadana”.