Carta d'El Garrapiellu a los Reis Magos

Son tiempos d’añu nuevu, tiempos de bonos deseyos. Pa El Garrapiellu ye complimientu escribir una carta a los Reis Magos. L’añu pasáu portáronse; traxéronmos una medayina de plata del Conceyu de Xixón. Esti añu, por si dexen dalguna sorpresa y pa nun perder la ilusión, vamos echala col aquel de pidi-yos dalgo pa nós y pa tola xente asturiano.
 
            Queríos Reis Magos:
 
Lo primero, que nun vos choque la iluminación navidiega d’esti añu en Xixón, tan estremada de la lluz d’otros años. Ye que tamos en procesu d’aclaranos les idegues y necesitamos bombilles p’allumanos. Eso sí, de baxu consumu pa nun gastar. Nun faigáis casu a bilordios del Niemeyer o la TPA. Nun somos malos, ye que n’Asturies hai una sociedá civil que tien de poner remediu a duernos culturales. Nun hai mal que por bien nun venga, pero hai que mudar tamién la mentalidá de les alministraciones, que como tán en quiebra nun faen otro que sacar los bolsos pa que los veamos vacíos.
 
Nosotros, escontra’l pidir de viciu y el non dar de vezu, tamos agora na virtú de tirar pela cai del medio, caleyando pa facer país. Camentamos qu’a les coses de la nuesa cultura nun hai que saca-yos rentabilidá, porque como ciudadanos tenemos drechu a ella.  Cola sida de la crisis niégense hasta los drechos sociales, cuantu más los culturales. Pero nun queremos arrenunciar a la identidá, que ye la dignidá de los individuos y los pueblos.
 
Naguamos por que los políticos y funcionarios de la política cultural d’esta tierra nun pierdan el son de la opinión de la cai y la so xente, qu’eso ye pa nós la democracia, y non repartise cargos cada cuatro años, tres les eleiciones. Podíeis trayenos dalgún de los dones que tenéis pal Oriente, pa qu’esclarien un pocu la mollera.
 
Tamién vos pidimos que la xente d'Asturies y los sos políticos valoren como un patrimoniu cultural y hestóricu de la mayor importancia la llingua asturiana, la ferramienta cola que’l pueblu d'Asturies foi a atalantar y espresar la so realidá n’abondo de sieglos. Y que caigamos na cuenta de qu’esti patrimoniu ye dignu de caltense con arguyu y normalizar el so usu social.
 
Si nun ye muncho, traye-ynos un bon Plan del Prerrománicu pa cuidar un patrimoniu únicu n’Europa. Falta nos fai la responsabilidá de los Gobiernos pa caltenelo y ponelo en valir, pero tamién l’enfotu de tolos asturianos, porque lo de ‘Patrimoniu de la Humanidá’ ye títulu qu’igual que se mos da, podemos perdelo si nun sabemos apreciar el nueso patrimoniu material o inmaterial.
 
Y que nun se nos vengan abaxo más horros, nin paneres. Dicen que nun hai perres p’allevantalos, nin siquiera los de Sietes o Bueño, y menos los de San Andrés de los Tacones. Pero unes poques perres bien podía habeles pal Pueblu d’Asturies, pa ser exemplu d’arquiteutura popular, formar una escuelina taller de remocicamientu, facer un llibrín con propuestes que valieren de modelu a particulares o aconseyar industries y materiales pa esti llabor.
 
Dalguna perra sí podía cayenos pa la difusión del descubrimientu del ADN del Home del Sidrón. Ye un referente mundial y nun mos enteramos. Si lu atoparen pa Indianápolis deprenderíase nes escueles, pero’l probe paisanu nun tuvo suerte: apaeció en Piloña.
 
Tamién poco necesitaríamos p’abrir al públicu xacimientos arqueolóxicos, acabar col enguedeyu La Campa Torres o amosar los castros de La Carisa pa qu’en dalgún llugar d’Asturies pudieren cuntanos la hestoria de los nuesos antepasaos como pueblu Ástur, les sos guerres escontra l’Imperiu Romanu o la romanización, ensin prexuicios.
 
A ver si podéis trayenos un migayín d’amor y reconocimientu polo de casa. Nun queremos ser más que naide, pero tampoco qu’al nuesu pueblu lu faigan de menos. Ye dir p’atrás negar lo que ye de nueso. Pidímosvos l’espoxige d’una cultura tradicional y contemporánea ente les cultures europees.
 
Y enseñanos a mirar polos árboles monumentales y pol patrimoniu natural nun yera malo. Tener, yá los tenemos, namás había que nun perdelos, como la Fayona d’Eiros. Ehí ta la de Sietes, menaciada poles sierres de los madereros. Podíeis trayenos inciensu o polvinos máxicos que camudaren los ocalitos en fayes y carbayos pa salvar les viesques que perdemos; o una plizca maxín pa convertilos n’industria tresformadora y non sólo quemalos o esfarrapalos pa facer papel. Que si la madera ye una industria, la natura ye otra, y l’equilibriu d’entrambes dos diba ser un ñeru oportunidaes pa la industria cultural.
 
Da-ynos tamién ánimu pa la xera de facer conciencia, que pa reflexonar so la situación del asturianismu cultural nun hai qu’esperar al 8 setiembre pa facer brindes al sol de la seronda. Asociaciones hai como la nuesa n’Asturies, y tiempu diba ser p’axuntanos a falar de cómo ta’l país. Aconceyar y aldericar nun cuesta perres y les idegues son una ferramienta cultural de primera pa meter nel discu duru del ordenador.
 
Y puxu pa la sidra, la nuesa poción máxica. Salú pa les pumaraes, plantones nuevos y menos mazana foriata, que nosotros damos-y al gargüelu pa bebela toa. Al mal tiempu, bona cara, que si la crisis nos apreta nun dexemos de riínos, nin perdamos la coña del calter asturianu. Y nun vos esmolecer, que de magar pasen los años, y anque les modes anglosaxones peguen fuerte, nós siempre vamos siguir fieles a los Reis Magos del Oriente, cuna de la cultura y de la civilización.


Tino Lozano ye presidente de la Tertulia Cultural El Garrapiellu.