Llamazares propón a los diputaos asturianos el facer frente común pa defender los fondos mineros

Gaspar Llamazares, diputáu por Asturies d’IX, unvió a los otros siete representantes del país nel Congresu un corréu electrónicu pa facer un frente común polos fondos mineros. Reclama “xunidá na defensa” del futuru de les cuenques.
 
El ex secretariu xeneral de la coalición a nivel estatal yá propunxera enantes de les eleiciones que los diputaos asturianos pactaran los asuntos claves pa defender los intereses del país. Tres l’anuncia de los axustes del Gobiernu, que dexen a Asturies ensin fondos mineros pa esti añu, Llamazares tantia per primer vez la disposición de los sos compañeros pa dar esi pasu, anque l’ésitu de la iniciativa paez complicao.
 
Nel corréu remitíu, el diputáu d’IX treslladó la posibilidá de soscribir de forma conxunta una carta al ministru d’Industria, Enerxía y Turismu, José Manuel Soria, o formalizar una proposición non de llei nel Congresu, pa solicitar al Gobiernu estatal que, en primer llugar, clarifique l’impautu de la midida prevista nel Real Decretu-llei 20/2011 en rellación a les zones mineres. Nel casu de confirmase la supresión de les partíes comprometíes, Llamazares apostó por "pidir que se reconsidere esta decisión col oxetivu d’evitar un perxuiciu mayor nestos conceyos y garantizar la financiación comprometida y el desarrollu de les inversiones previstes".
 
"Los diputaos asturianos debemos defender el futuru de les cuenques mineres y nun pue haber escuses p’articular una iniciativa conxunta en defensa de los intereses xenerales", consideró Llamazares, que’añadido qu’esta zona d’Asturies "merez una ‘altura de mires’ y compromisu políticu, pero, sobre manera, xunidá na defensa del so futuru".