‘Dobleces’, tercer trabayu d’Alfredo González, yá ta na cai

Alfredo González ta acabante d’asoleyar el so tercer trabayu d’estudiu, el segundu qu’incorpora la llingua asturiana. ‘Dobleces’ ye un discu doble con diez cantares n’asturianu escritos por Pablo Texón y otros diez propios en castellanu.
 
Producíu por Sergio Rodríguez y editáu por Algamar Producciones, esti álbum tien dos collaboraciones especiales. Per un lláu ta la del músicu lleonés Fabián en ‘Todos llevan disfraz’ y, per otru, la del conocíu cantautor madrilanu Quique González, que s’atreve col asturianu en ‘Wikileaks’. Na presentación del discu, Alfredo señaló qu’espera qu’esta collaboración de renome sirva pa que los asturianos pierdan la vergoña n’utilizar la so llingua.
 
Según esplica’l músicu mierense, ‘Dobleces’ ye “resultancia de trés años de carretera secundaria y pensiones barates; un compendiu de fotografíes feches a mano y ensin encuadre fixu. Escrites nos dos idiomes nos que miento y feches música ensin pensar en quién va poneles na radio. Equí ta too lo que suena na mio cabeza. Cenciellamente cantares”. Los diez compuestos en castellanu son obra del propiu autor, mentes que fechos n’asturianu son a partir de lletres escrites pol poeta Pablo Texón, testos que fuxen del costumbrismu. Éstos tienen “una llinia trescendental pero polivalente, que combina un sentimentalismu pocu adulteráu –‘La última fueya’– con distintos graos d'escepticismu –‘Esperanza en formol’– y el más ocurrente sarcasmu –‘Golpe/silenciu’–”, y caltienen los elementos básicos del so trabayu anterior: lletres certeres de temática esistencialista con una base rock, que nun arrenuncia a tocar otros estilos musicales.
 
Alfredo González colgó’l sábadu nel establecimientu uviedín La Caja Negra el cartelu de ‘nun hai entraes’ nel conciertu-presentación del discu doble. Los siguidores que nun pudieron acudir a esa actuación pola falta de papel van poder sentir los cantares de ‘Dobleces’ el 27 de xineru na xixonesa Sala Acapulco a partir de les 22 hores nuna xornada na que tamién van tocar Edu Vigil y Carás. La xira que principia’l de Turón tres la edición del so tercer trabayu tien confirmaes trés paraes más: mañana en Madrid, el miércoles en Lleón xunto con Fabián, y el 3 de febreru en València.