El Conceyu de Xixón, obligáu a devolver a la Universidá la parcela onde se celebró la ‘Semana Negra’

El conceyal Rafael Felgueroso informó que’l xulgáu dio la razón a la Universidá d’Uviéu nel pleitu pola titularidá de la parcela onde se celebró la ‘Semana Negra’ esti añu. El rector, Vicente Gotor, manifestó la so satisfaición pola sentencia.
 
El Xulgáu de Primera Instancia númberu 6 de Xixón estimó de manera parcial la demanda de la Universidá contra’l Conceyu, polo qu’obliga a ésti último a devolver la propiedá de la parcela multiusos asitiada xunto a la Escuela de Marina qu’acoyó esti añu a la ‘Semana Negra. L’Ayuntamientu xixonés destinara 784.007 euros pal acondicionamientu de los terrenos a cargu del 'Plan A' de Xixón, una inversión pola que nun se sabe si se pue reclamar compesación dalguna, según señaló Felgueroso. Tampoco si pue esixise dalguna responsabilidá al Gobiernu pola cesión d’una parcela que nun-y pertenecía d’alcuerdu a a sentencia. "Too ye valorable", señaló’l voceru del equipu de gobiernu municipal.
 
La Universidá interpuso la demanda sobre la titularidá de la propiedá nun intentu d’impidir que se celebrara l’eventu ferial nesa parcela xunto al campus, llegando inclusive a solicitar midíes cautelares qu’evitaren too actu que nun fora cultural. El Xulgáu, nesi casu, nun-y dio la razón al nun tar firmáu entós el conveniu cola organización de la ‘Semana Negra’ pa la so celebración na parcela.
 
El rector Vicente Gotor mostróse "satisfechu" pola sentencia y resaltó que’l fechu de que la xusticia dea la razón a la Universidá implica que la institución tenía "argumentos" pa reclamar la so titularidá. "Yera de nueso, reclamámosla y, de primeres, dannos la razón", resaltó Gotor, pendiente d’analizar en detalle la sentencia.
 
Nel aire
 
La ‘Semana Negra’, que nel 2012 cumpliría 25 años, tovía nun tien ubicación. L’equipu de gobiernu yá anunciara que la parcela de la sentencia nun diba repetir como sede del festival dedicáu a la novela negra, pero tovía nun entamó negociaciones con Paco Ignacio Taibo II, organizador del eventu, pa buscar un sitiu afayadizu pa la edición de xunetu. La retirada anunciada de les subvenciones que venía recibiendo y el poco interés del Conceyu, enfotáu na puesta en marcha del Festival Arcu Atlánticu (del 21 al 29 de xunetu) en feches similares a les tradicionales de la ‘Semana Negra’, faen pensar nuna posible marcha del eventu a otra ciudá.