La Selmana de les Lletres va tar dedicada a la poesía de la Ilustración

Emilo Marcos Vallaure anunció que la XXXIII Selmana de les Lletres Asturianes va tar dedicada a la poesía y los poetes de la Ilustración. Foi na entrega de los Premios Lliterarios 2011 que tuvo llugar esti martes nel Palaciu d’Inclán Leiguarda d’Uviéu.
 
Autores de la tamién nomada Xeneración de Mediu Sieglu, como Gaspar Melchor Xovellanos y la so hermana Xosefa, Bruno Fernández Cepeda, Antón Balvidares Argüelles, González Villar, Teresa Cónsul o Benito A. Ahuja, van ser estudiaos y recordaos na selmana qu’arrodia al Día de les Lletres Asturianes, que va celebrase’l 4 de mayu. D’esta forma, los ilustraos asturianos garren el relevu de Mánfer de la Llera, protagonista de la edición d’esti añu.
 
Na so intervención, en llingua asturiana, el conseyeru de Cultura y Deporte, que tuvo acompañáu por Alfredo Ignacio Álvarez Menéndez, direutor xeneral de Política Llingüística, destacó’l so “compromiso cola creación lliteraria n’asturianu”, pa lo que tien previsto desarrollar un programa d’apoyu al traviés de subvenciones y averamientu a los centros escolares, y señaló la necesidá de poner en conocimientu de los asturianos “que tienen la última oportunidá pa que nun desapaeza esa parte común que ye la cultura asturiana”. Otra manera, fixo referencia a la importancia que tien la dignificación d’una llingua pa la so normalización social.
 
L’actu de los Premios Lliterarios 2011, celebráu ante numberosu públicu, entamó cola entrega del IV Premiu María Josefa Canellada por ‘Camín de lletres: d'Asturies a Nueva York’ a Paquita Suárez Coalla, autora residente nesa ciudá estauxunidense que viaxó hasta Uviéu a recoyer el gallardón tres muchos años ensin visitar el país. La emigrante destacó que los guaḥes yeren el futuru de la llingua asturiana, dalgo que-y motiva pa escribir lliteratura infantil y xuvenil. Tres ella, xubió a la tarima Isaac del Rivero, ganador del III Premiu Alfonso Iglesias de cómic por ‘Doña Berta”, que anunció que diba siguir creando obres d’una forma clásica, “con papel, pincel y acuarela”, pese a los sos problemes de visión.
 
El XVII Premiu Xuan María Acebal foi pal poemariu ‘Un cierto desorde’, de Xosé Ánxelu Gutiérrez, que dedicó’l gallardón a la so güela pa, darréu, destacar el papel perimportante que tienen los güelos na tresmisión del idioma. Pela so parte, Lluis Portal Hevia tuvo pallabres de reconocimientu pal escultor Cipriano Folgueras tres recibir el XVII Premiu Máximo Fuertes Acevedo pol ensayu ‘Cipriano Folgueras, una gloria d’Asturies”. Nesti momentu del actu, Marcos Vallaure aprovechó pa destacar qu’una escultura del uviedín va esponese’l mes qu’entra nel Muséu de Belles Artes procedente del Museo del Prado, “una obra pola que llevábamos insistiendo denda hai munchu tiempu”.
 
Pa terminar, Xandru Fernández recoyó’l so tercer Premiu Xosefa Xovellanos, qu’esti añu vivía la so edición númberu 32, por ‘El príncipe derviche. L’escritor dedicó’l gallardón a “tolos militantes del procesu de recuperación llingüística, porque ensin ellos nun esitiría la lliteratura asturiana”.
 
Na semeya, un momentu de la intervención d'Isaac del Rivero baxo la mirada atenta d'Alfredo Ignacio Álvarez Menéndez y Emilio Marcos Vallaure.