Cuatro carniceríes asturianes yá pueden comercializar de manera oficial la marca ‘Gochu Asturcelta’

La marca coleutiva ‘Gochu Asturcelta’ presentóse esti llunes na Conseyería d’Agroganadería y Recursos Autóctonos. Cuatro carniceríes yá pueden comercializar esta marca de manera oficial tres roblar un alcuerdu cola asociación de criadores.
 
Estos establecimientos son les carniceríes El Rosal (Grau), Colunga (Uviéu), Delfina (Avilés) y Chacinera Gancedo (Tinéu). D’esta forma, los sos veceros van poder mercar carne y embutíos de gochu asturcelta baxo esta marca de garantía que “certifica que’l productu cumple colos requisitos de control de los animales –criaos n’esplotaciones pequeñes, en réxime d’estensivu y de manera artesana– y de calidá de la carne, garantizando d’esta manera que’l consumidor ta adquiriendo un productu de primerísima calidad. Cola firma de la marca coleutiva, les carniceríes que vendan gochu asturcelta van distinguise por una etiqueta van tener nos productos y tamién nos sos escaparates pa informar a los sos clientes”, espliquen dende l’Asociación de Criadores de Gochu Asturcelta (ACGA).
 
L’actu de presentación oficial de la marca presidiólu’l presidente d’esti coleutivu, José Manuel Iglesias, xunto col conseyeru d'Agroganadería, Albano Longo, y el cocineru y asesor gastronómicu de productos d'esta carne, Ramón Celorio. "La xente sabe que lo que nun lleve esi sellu nun ta garantizao", esplicó Iglesias, acabante recordar que "hasta agora namás podía garantizase que la raza yera de gochu asturcelta, pero non la crianza –esíxese la cría n'estensivu, con un tipu de piensos y nunos metros determinaos por animal–". Cola entrada en vixencia de la marca oficial, los ganaderos confíen n'aumentar los datos de comercialización. Esti añu matáronse 200 canales y, según Iglesias, la intención ye qu'en 2012 puedan llegar a les 500. L'aprovechamientu de carne ye d'unos 120 quilos por animal, mentes que’l preciu que se paga al ganaderu ye nesti momentu de 3,35 euros por quilu, "penriba del gochu ibéricu de recebu, que ye la nuesa referencia principal", señala’l presidente de los criadores.
 
Anguaño hai 3.200 exemplares marcaos, munchos d'ellos yá consumíos, y los ganaderos disponen d'unes 400 femes reproductores y unos 150 machos sementales. Iglesias destacó la ilusión del sector y la esperanza de que'l dineru que xenere esta producción "revierta nel campu asturiano". Amás, señaló que lo ideal "nun ye qu'haya diez empresarios con 500 gochos, sinón 500 ganaderos con 20 gochos", polo que fixo un llamáu a siguir espardiendo la cría d'esti animal.
 
Pela so parte, Longo mostró'l so deséu de que la recuperación d'esta raza y la so comercialización oficial valga como "exemplu simbólicu" pa otres producciones n'Asturies. Destacó que l’Estáu ye'l segundu productor de carne de gochu d'Europa y el cuartu del mundu, polo que, nesti contestu, "hai que potenciar esti gochu de la rama celta".


Na semeya, José Manuel Iglesias, Albano Longo y Ramón Celorio.