L’Entregu vive esti vienres un conciertu folk solidariu col Sáḥara

José Manuel Tejedor y Alberto Ablanedo, Gueta na Fonte, Blima y Na Zona van participar esti vienres en L’Entregu nun conciertu solidariu col Sáḥara Occidental. Un Orbayu en el Desierto entama esta actividá.
 
La recaudación del conciertu y de la fila cero (Caxa Rural, 3059 0051 63 2450443722) va dir destinada a proyeutos solidarios en los campamentos de Tinduf y a Kibera (Kenia). L’oxetivu d’Un Orbayu nel Desiertu, proyeutu entamáu nel 2008 en Casu, ye “desarrollar, al traviés de gotes de solidaridá pequeñes de la xente de la cultura asturiana, iniciatives que meyoren la vida de los campamentos de refuxaos de Tinduf, poniendo un enfotu especial nos más mozos y desfavorecíos”, que nesta ocasión amplíense tamién a una barriada de Nairobi, nel otru estremu del continente. Amás, pretende averar la realidá del continente africanu, en concreto del pueblu saḥarianu, a la sociedá asturiana.
 
El Teatru Municipal de L’Entregu va acoyer estes trés actuaciones de formaciones y músicos punteros del folk del país el vienres a les 20.30 hores. El preciu ye de 9 euros, 10 na puerta, y les entraes pueden reservase nel teléfonu 692.136.894. Los puntos de venta son: Café La Palmera ( La Pola Ḷḷena); Abellugu (Mieres); Cafetin de Aroa y Sidreria Canteli (Xixón); Ca Beleño (Uviéu); Diañu (La Pola Siero); Tom Malory (La Felguera y L'Entregu); La Tasca (Sama); Folixa (Ciañu); Aniciu (L'Entregu); Sidreria Ana (Sotrondio); Oca Negra (Blimea); El Carbonero (Llaviana); Carniceria Merin (Villoria); Autosevicio Del Rio (Sobrescobiu); y Albergue Camín de Redes, Bar-tienda La Campa y Restaurante Mirador (Casu). El Conceyu de Samartín del Rei Aurelio y l’Asociación de Amigos del Pueblo Saharaui collaboren con esta iniciativa.