Iniciativa pol Asturianu va sofitar la manifestación del Día de les Lletres qu’entama la XDLA

Iniciativa pol Asturianu, que’l sábadu va presentase en sociedá con un actu n’Uviéu, aconceyó nes selmanes últimes cola ALLA, la FCyN y la XDLA. L’asociación de creación nueva confirmó que va sofitar la manifestación del Día de les Lletres.
 
Con estos alcuentros, la organización quinxo dar a conocer a estos trés intituciones y coleutivos el so proyeutu enantes de facelu públicu. L’aconceyamientu con Ana María Cano, presidenta de l’Academia de la Llingua Asturiana, tuvo llugar el 7 d’avientu na sede académica y, según informen dende Iniciativa pol Asturianu, los sos oxetivos “foron recibíos de forma positiva” pola profesora universitaria. D’igual forma, los responsables d’entamar estos primeros contautos tamién visitaron nestes feches a Ramón d’Andrés, presidente de la Fundación Caveda y Nava (FCyN), y a los cabezaleros de la Xunta pola Defensa de la Llingua Asturiana, Xulio Casado y Carlos Pulgar. Con respeuto a esti alcuentru últimu, dende Iniciativa pol Asturianu señalaron que “dambes asociaciones abrieron pontes de diálogu y collaboración nel ámbitu de la reivindicación llingüística” y confirmaron que van sofitar la manifestación pola oficialidá del Día de les Lletres Asturianes del añu qu’entra.
 
Mañana, a les 19 hores na Biblioteca d’Asturies (El Fontán), va celebrase la presentación d’esta organización que “ñaz pa implicar a tola sociedá asturiana nel procesu de recuperación y normalización del asturianu, y que va trabayar tanto col sector públicu como col priváu a la busca de nuevos espacios de normalidá pal idioma asturianu”. L’asociación entama la so actividá pública depués de dellos meses de trabayu discretu “pa xenerar una estructura, crear la so páxina web, materiales y dir xenerando una rede de voluntariáu a lo llargo de tol territoriu asturianu”.
 
L’actu previstu n’Uviéu va consistir nuna gala presentada pola periodista Mariluz Pontón na que van esplicase les idees básiques del coleutivu. Xunto a les intervenciones de personalidaes de delles estayes de la sociedá asturiana tamién va haber güecu pa la música, coles actuaciones de Mariluz Cristóbal Caunedo y Tante, y l’humor, de la mano del monologuista Lluis Antón González. Tres l’eventu, que va tener dalguna qu’otra sorpresa, va celebrase una folixa nel chigre L’Esperteyu.
 
Campaña de captación de socios
 
Iniciativa pol Asturianu yá fixo públiques les dos modalidaes de sociu que tien establecíes: sociu miembru y sociu simpatizante. La primer d’elles ta pensada p’aquelles persones que quieran implicase na organización y tien una cuota mensual de 6 euros –o un pagu añal reducíu –, mentes que la segunda ye pa la xente que namái quiera ser socio, ensin participar nel día a día del coleutivu. Esta modalidá tien un coste de 20 euros añales.