La XDLA concede’l pegollu al vinu Ḷḷumés y el madreñazu a César Movilla, alcalde de Noreña

La Xunta pola Defensa de la Llingua Asturiana (XDLA) dio a conocer esti miércoles a los ganadores de los XXVII Premios Andrés Solar. El pegollu foi pal vinu Ḷḷumés y el madreñazu pa l’alcalde de Noreña, César Movilla.
 
La versión positiva del gallardón viaxa d’esta forma a Cangas del Narcea, en concreto a Bodegas Obanca, onde se fai’l vinu Ḷḷumés, el primeru n’etiquetase n’asturianu. “La Xunta quier reconocer l’usu que fai de la llingua asturiana na marca Ḷḷumés, nun exemplu de normalidá y puesta en valor de les nuestres señes d’identidá. La visibilización social del idioma nun sector clave y la recuperación de la toponimia asturiana son dalgunes de les razones poles que se dan esti premiu”, señalen dende’l coleutivu ciudadanu.
 
Mentes, el madreñazu, la versión negativa, tien como destín Noreña. El alcalde del conceyu, César Movilla, recibe esti premiu “d’honor duldosu” pola “so actitú repetida de rechazu al usu de la llingua asturiana nel ámbitu de la so competencia, vulnerando d’esta manera tanto los derechos de la ciudadanía xeneral como la de los sos llexítimos representantes democráticos”. D’esta forma, Movilla sucede nel gallardón Herminio Sastre, ex conseyeru d’Educación y Ciencia. El ganador del pegollu nel 2010 foi’l programa ‘Camín de Cantares’ de la TPA.
 
La entrega de los XXVII Premios Andrés Solar va tener llugar nel salón d’actos del Centru Cultural Antiguu Institutu de Xixón el día 23 a les 19.30 hores. Tres l’actu, va celebrase una espicha na sidrería Canteli, con entrada por 20 euros. Los interesaos en participar han d’acutar sitiu mediante vía teléfonica nel telefónu 985.229.553 o nel 679.650.998, enantes del miércoles 21 d’avientu.