Marcos Vallaure y Varela nun lleguen a nengún alcuerdu sobre’l Niemeyer tres una reunión de 13 hores

Tres el pieslle del domingu del Centru Niemeyer, el llunes vivióse n’Uviéu una negociación ente Emilio Marcos Vallaure y Pilar Varela sobre’l futuru del complexu cultural. Tres 13 hores de reunión, nun hubo alcuerdu nengún.
 
Xunto col conseyeru de Cultura y Deporte, y la vicepresidenta de la Fundación Centru Niemeyer y alcaldesa d’Avilés, tamién tuvieron presentes el viceconseyeru de Seutor Públicu, Luis de la Vallina y el conceyal de Cultura, Román Antonio Álvarez. Nun comunicáu, Varela indicó que queda a la espera de que na mañana de güei’l Gobiernu dea la so posición definitiva. La socialista apostó porque "la Fundación continúe cola so actividá’l día 16 y que siga funcionando”, y señaló que, "de nun ser positiva –la respuesta del Executivu–, la Fundación finalizará’l so venceyu y responsabilidá de xestión del Centru Niemeyer, que pesllará les sos puertes". El xueves ye’l día que termina la cesión d’usu de les instalaciones a la Fundación, anque dende’l domingu a última hora nun hai actividá nel Niemeyer.
 
Por último, Varela apuntó que tovía "hai posibilidá d’alcuerdu. La decisión ta en manes del Principáu". Nel casu de que nun se renueve’l conveniu, el Gobiernu del país tien la intención de xestionalo a partir del vienres, anque nun especificó cómo.