El Gobiernu autoriza sondeos d’investigación en Salave

El BOPA d’esti llunes espublizó l’aprobación de sondeos d’investigación en Salave a la sociedá Exploraciones Mineras del Cantábrico pese a la oposición vecinal a la mina d’oru. Ecoloxistes llamenten les prises del Gobiernu n’autorizalos.
 
Según esplica’l Boletín Oficial del Principáu d’Asturies (BOPA), el ‘Proyeutu d’investigación complementaria, al oxetu de poder evaluar la esplotación del yacimientu d’oru de Salave por minería interior –sondeos xeotéunicos–’ tien como finalidá “conocer los resultaos téunicos pa poder determinar la viabili­dá d’una galería futura d’esploración, yá que los sondeos son necesarios pa estimar les carauterístiques xeotéuniques de les roques que va cruzar la galería y tar preparaos pa posibles imprevistos”. En total son siete sondeos que van desarrollase a lo llargo de 1.800 metros con una distancia ente ellos de 200 a 250 metros.
 
El proyeutu de la mina d’oru de Salave tien un refugu vecinal perfuerte, como amuesen los 356 alegaciones presentaes mientres la información pública del estudio preliminar d’impautu ambiental a estos sondeos. El propiu Conceyu de Tapia solicitó la denegación del permisu en base a los problemes de ruíu que van producise, la contaminación d’acuíferos y la intención de facer ún de los siete sondeos previstos en zona de servidume de l’Autovía del Cantábricu. Partíos políticos como Los Verdes d’Asturies y Los Verdes-Grupu Verde, y dellos grupos ecoloxistes tamién presentaron alegaciones al proyeutu.
 
Ún d’ellos, la Coordinadora Ecoloxista d’Asturies, asoleyó un comunicáu tres conocer la decisión de la Conseyería d’Economía y Emplegu nel BOPA. Pa esti coleutivu el Gobiernu nuevu del país, “una vegada más”, cede “a los intereses empresariales y permite sacar alantre a la empresa minera los sondeos contra la opinión mayoritaria de los vecinos, a pesar de les irregularidaes numberoses que se produxeron na solicitú y na tramitación alministrativa”, polo que piensen recurrir l’alcuerdu. Nesti recursu nuevu, los ecoloxistes van reiterar “les inconsistencies y deficiencies téuniques graves detectaes nel espediente sometíu a información pública y que’l Principáu nuevu da por bonu”.
 
Aspiración vieya de multinacionales
 
La llucha de los vecinos de Tapia y de grupos ecoloxistes asturianos contra la mina d’oru de Salave vien de llargo. Inclusive, el pasáu 5 de xunu celebraron nel llugar el Día Mundial de Mediu Ambiente n’apoyu a la Plataforma Oro No. Na convocatoria d’esti eventu denunciaben que la mina d’oru en Salave “ye yá una vieya aspiración de les multinacionales –caúna heredera de la anterior– dedicaes a la esplotación d’esi metal preciáu. Un proyeutu col qu’intenten xenerar esperances ente la población pa ganar el so apoyu, ufiertando cientos de puestos de trabayu y millones d’euros de beneficiu pal conceyu”. Sicasí, puntalizaben que la verdá suel ser otra porque “tenemos la esperiencia de les falsedaes que resultaron de promeses similares n’otres esplotaciones d’oru asturianes, como Balmonte y Salas, onde una vez sacáu’l beneficiu dexen la hipoteca de los residuos y los espacios ensin restaurar”.