Estrénase la obra de teatru “Oh 36!”, ganadora del Premiu Ciudá d’Uviéu

Esti vienres día 6 de marzu, el grupu teatral Syntexto estrenará la obra dramática “Oh 36!” de Lluís Portal -galardonada nel añu 2007 col Premiu Uviéu, que convoca'l conceyu uvieín-, nel Teatru Riera de Villaviciosa. La obra inspírase na esperiencia vivida pol médicu y escritor maliayés Carlos de la Concha García-Ciaño (Villaviciosa 1887 - Xixón 1965) nel trescursu de la guerra civil española. 

Según informa’l propiu autor de la obra, Carlos de la Concha yera un “home conservador, monárquicu, católicu, durante la dictadura de Miguel Primo de Rivera, De la Concha formó parte de la formación política creada por ésti, la Unión Patriótica. Foi diputáu provincial, y fundador de los ateneos de Villaviciosa y Xixón. Fundó en 1929 -y dirixó- el periódicu local Orientaciones, d'ideoloxía conservadora, que siguió publicándose hasta l'españíu de la guerra. Escribió en castellanu y asturianu. En rima bable dio a la imprenta Ensueños y añoranzas (1923) y Cuentos perreros (1953)”.

Lluis Portal conseña que “nel trescursu del conflictu bélicu, el doctor escondióse nun zulo realizáu na so propia casa -l'edificiu, de tres plantes, aínda esiste na Plaza de Carlos I de Villaviciosa-, perfeutamente disimuláu, cola fin de protexese de la persecución a que lu sometió de forma personal y concienzuda -pero infructuosa- el dirixente anarquista y masón Cristóbal Cano Servet, empleáu de la fábrica El Gaitero, y presidente del Atenéu Obreru de Villaviciosa, hasta que partiera al esiliu. Durante los 15 meses que permaneció abellugáu nel so propiu domiciliu, el doctor escribió un interesante diariu rimáu que, aínda anguaño, permanez inéditu (sacando les revelaciones recientes efectuaes por Etelvino González López na so obra Ni cautivos ni desarmados. Asturianos refugiados en Cataluña 1937-1939, de Krk edidiciones, 2008), nel que cuenta de forma detallada los acontecimientos de la guerra a los que tenía accesu, refiriéndose tanto a cuestiones locales, como a otres más xenerales”. Nesta esperiencia básase la obra de teatru del escritor maliayés.